काठमाडौं । प्रतिनिधिसभा र राष्ट्रियसभाको बैठक बस्नुअघि संघीय संसद्का ९ वटा संसदीय समिति एकैदिन सक्रिय हुने भएका छन्। संसद् बैठक भदौ ८ र राष्ट्रियसभा बैठक शुक्रबारका लागि तय भएकाले समितिहरूले विभिन्न विधेयक, सरकारी कामकारबाही, विकास आयोजना र आर्थिक विषयमा छलफल गर्न लागेका हुन्।अर्थ समितिले नेपाल राष्ट्र बैंक ऐन संशोधन विधेयकमाथि दफावार छलफललाई निरन्तरता दिनेछ। बैठकमा अर्थमन्त्री र अर्थसचिवसमेत सहभागी हुनेछन्।
अन्तर्राष्ट्रिय सम्बन्ध तथा पर्यटन समितिले पर्यटन विधेयकबारे होटल एसोसिएसन नेपाललगायत सरोकारवालासँग छलफल गर्नेछ। उद्योग तथा वाणिज्य समितिले प्राप्त उजुरीमाथि छलफल गर्ने कार्यसूची राखेको छ। कृषि तथा प्राकृतिक स्रोत समितिले रासायनिक मलको प्रयोग घटाउँदै जैविक तथा प्राङ्गारिक मलको उत्पादन र प्रयोग बढाउने विषयमा उत्पादकसँग छलफल गर्नेछ। पूर्वाधार विकास समितिले बागमती ब्युटिफिकेसन आयोजनाको प्रगतिबारे छलफल गर्नेछ।
यता राज्य व्यवस्था तथा सुशासन समितिमा अख्तियार दुरुपयोग अनुसन्धान आयोगको कामकारबाहीबारे आयोगका पदाधिकारीसँग छलफल हुँदैछ। शिक्षा, स्वास्थ्य तथा सूचना प्रविधि समितिले राष्ट्रिय विधि विज्ञान प्रयोगशाला स्थापना तथा सञ्चालनसम्बन्धी विधेयकमाथि छलफल गर्नेछ।सार्वजनिक लेखा समितिले नेपालले प्राप्त गर्ने वैदेशिक सहायताको लेखापरीक्षणको विषय उठाउनेछ भने विधायन व्यवस्थापन समितिले विधायिकी अन्तरसम्बन्धबारे गाउँपालिका राष्ट्रिय महासंघका प्रतिनिधिसँग छलफल गर्नेछ।
यसरी एउटै दिन संसद्का समितिहरूमा अर्थतन्त्र, पर्यटन, कृषि, विकास, सुशासन, शिक्षा, वैदेशिक सहायता र कानुन निर्माणसँग जोडिएका महत्वपूर्ण विषय छलफलमा आउँदैछन्। संसद्को पूर्ण बैठकअघि समितिहरूको सक्रियताले सरकारका कामकारबाहीदेखि महत्वपूर्ण विधेयक र सार्वजनिक खर्चसम्म निगरानी बढाउने संकेत दिएको छ। आजका छलफलबाट उठ्ने विषयले आगामी संसद् बैठकमा समेत राजनीतिक बहसको रूप लिन सक्ने देखिन्छ।
