काठमाडौं । काठमाडौं उपत्यकामा ट्राफिक नियम उल्लंघन गर्ने चालकविरुद्ध प्रहरीले कारबाही तीव्र बनाएको छ। पछिल्लो २४ घण्टामा मात्रै १ हजार १७८ जना चालक कारबाहीमा परेका छन्।
ट्राफिक प्रहरीका अनुसार सबैभन्दा धेरै तीव्र गतिमा सवारी चलाउने १४१ जना कारबाहीमा परेका छन्। त्यस्तै लेन अनुशासन उल्लंघन गर्ने ७५ र मादक पदार्थ सेवन गरी सवारी चलाउने ६६ जना चालक कारबाहीमा परेका छन्।
रातोबत्ती उल्लंघन गर्ने ६६, सीसीटीभी निगरानीबाट पहिचान भएका ६९, हर्न निषेध उल्लंघन गर्ने ४२, अवस्था ठीक नभएका सवारी चलाउने ३५ र एकतर्फी सडकको नियम उल्लंघन गर्ने २१ जना पनि कारबाहीमा परेका छन्।
अन्य विभिन्न ट्राफिक नियम उल्लंघनमा ६६३ जना चालक कारबाहीमा परेको प्रहरीले जनाएको छ।
कारबाहीको तथ्यांकले उपत्यकामा अझै पनि तीव्र गति, लेन अनुशासन, मापसे र ट्राफिक संकेत उल्लंघन मुख्य समस्या रहेको देखाएको छ। विशेषगरी तीव्र गतिमा सवारी चलाउनेको संख्या उच्च देखिनुले सडक सुरक्षामा चुनौती कायमै रहेको संकेत गरेको छ।
२४ घण्टामै १ हजारभन्दा बढी चालक कारबाहीमा पर्नुले उपत्यकाको सडकमा ट्राफिक नियम पालना अझै कमजोर रहेको देखाएको छ। प्रहरीले निगरानी र कारबाही बढाइरहे पनि दुर्घटना न्यूनीकरणका लागि चालक स्वयं जिम्मेवार बन्नुपर्ने देखिन्छ।
