काठमाडौं । नेपाली कांग्रेसभित्रको आन्तरिक विवाद अब नयाँ चरणमा प्रवेश गरेको छ। संस्थापनबाट अलग भएको शेरबहादुर देउवा–डा. शेखर कोइराला समूहले साउन २९ गतेदेखि राष्ट्रिय भेला गर्ने घोषणा गरेसँगै पार्टीभित्रको शक्ति संघर्ष थप तीव्र बनेको छ। यो भेला केवल नियमित बैठक नभई कांग्रेसको भावी दिशा र सम्भावित राजनीतिक समीकरण तय गर्ने मञ्चका रूपमा हेरिएको छ।
भेलाको तयारीलाई अन्तिम रूप दिन शुक्रबार समूहको बैठक बस्दैछ। बैठकले प्रतिनिधि छनोटको मापदण्ड, जिम्मेवारी बाँडफाँट, दस्तावेज तयारी तथा कार्यक्रम सञ्चालनको ढाँचा टुंगो लगाउनेछ।इतर समूहले भेलामार्फत पार्टीको राजनीतिक कार्यदिशा, सांगठनिक पुनर्संरचना, नीतिगत सुधार र वर्तमान नेतृत्वको भूमिकाबारे विस्तृत प्रस्ताव प्रस्तुत गर्ने तयारी गरेको छ। यसअघि सातै प्रदेशमा कार्यकर्ता र नेतासँग परामर्श गरिसकेको समूह अब राष्ट्रिय स्तरमै साझा धारणा निर्माण गर्ने योजनामा छ।
भेला काठमाडौंमा हुने तय भए पनि सहभागी संख्या धेरै हुने अनुमानका कारण उपयुक्त इन्डोर हलको खोजी भइरहेको छ। आवश्यकता अनुसार कार्यक्रम दुईदेखि तीन दिनसम्म सञ्चालन हुन सक्ने जनाइएको छ।विशेष महाधिवेशनपछि गगन थापा नेतृत्वसँगको विवाद अझै समाधान हुन नसकेको अवस्थामा यो भेला कांग्रेसको आन्तरिक राजनीतिमा निर्णायक बन्न सक्ने विश्लेषण गरिएको छ। इतर समूहका नेताहरूले समयमै सहमति नभए नयाँ राजनीतिक विकल्प समेत खुला रहने संकेत दिएका छन्।
राष्ट्रिय भेला नजिकिँदै जाँदा कांग्रेसभित्रको विवाद समाधानतर्फ जान्छ कि अझ गहिरिन्छ भन्ने चासो अहिले राजनीतिक वृत्तमा बढेको छ।
