चितवन— चितवनको माडी नगरपालिकास्थित बघौडा अस्पतालका चिकित्सक तथा स्वास्थ्यकर्मीमाथि भएको आक्रमण प्रकरणमा संलग्न ४ जना युवालाई प्रहरीले नियन्त्रणमा लिएको छ। इलाका प्रहरी कार्यालय माडीका प्रहरी निरीक्षक किरण राईका अनुसार अस्पतालले दिएको निवेदनका आधारमा माडीका किरण खाती, सङ्गम तिवारी, विकास गुरुङ र प्रकाश गौतमलाई पक्राउ गरिएको हो।
गत बिहीबार राति करिब १०ः१५ बजे मादक पदार्थ सेवन गरेको अनुमान गरिएका युवाहरूको समूह अस्पताल परिसरमै प्रवेश गरी चिकित्सक र स्वास्थ्यकर्मीमाथि गरिएको कुटपिटका कारण उनीहरू घाइते भएका थिए।
बघौडा अस्पतालका निमित्त मेडिकल सुपरिटेन्डेन्ट डा. धीरञ्जनकुमार साहका अनुसार आक्रमणका क्रममा डा. दीपेन्द्र विश्वास, डा. देवेन्द्र विश्वास, स्वास्थ्यकर्मी अनुप सुवेदी, कविराज तिवारीलगायतलाई चोटपटक लागेको छ। आक्रमणकर्ताहरूले दुर्व्यवहार गर्दै अपशब्द प्रयोग गरेको समेत अस्पतालले जनाएको छ।
प्रहरीले घटनाबारे थप अनुसन्धान थालिसकेको छ। चिकित्सकहरूको तर्फबाट कुटपिट मुद्दा दर्ता गर्ने तयारी भएकाले कानुनी प्रक्रिया अदालतमार्फत अघि बढ्ने निरीक्षक राईले बताए।
नेपाल चिकित्सक सङ्घ चितवनका वरिष्ठ उपाध्यक्ष डा. दीपेन्द्र न्यौपानेले स्वास्थ्यकर्मीमाथि हातपातजस्तो गम्भीर घटनामा संलग्न सबैलाई कानूनअनुसार कडा कारबाही गर्न माग गरेका छन्।
