काठमाडौं— नेपालमा एचआईभी संक्रमितको संख्या ३४ हजार भन्दा बढी नाघेको छ । विश्व एड्स दिवसको अवसरमा आयोजित अन्तरक्रिया कार्यक्रममा राष्ट्रिय एड्स तथा यौनरोग नियन्त्रण केन्द्रका निर्देशक डा. सर्वेश शर्माले देशभर ३४ हजार ३३७ जनामा एचआईभी संक्रमण पुष्टि भइसकेको जानकारी दिए।
उनका अनुसार कुल संक्रमितमध्ये १५ वर्षभन्दा माथिका ३३ हजार २७९ जना छन्। सो मध्ये १४ हजार महिला र १९ हजार २७९ पुरुष छन्। यस्तै १ हजार ५८ बालबालिकामा समेत एचआईभी संक्रमण देखिएको छ।
गत वर्ष आमाहरूमा गरिएको परीक्षणका क्रममा २ सय २७ नवजातरबालबालिकामा एचआईभी पुष्टि भएको रिपोर्ट उनले प्रस्तुत गरे।
सन् २००० यता नयाँ संक्रमण ७६ प्रतिशतले घटेको डा. शर्माको भनाइ छ । अझै लक्ष्यअनुसार कम्तीमा ९० प्रतिशतसम्म कमी ल्याउनुपर्ने आवश्यकता रहेको उनले बताए।
उनका अनुसार हाल ८८ प्रतिशत संक्रमित नियमित रूपमा उपचार (औषधि) मा छन् भने ७६ प्रतिशतले भाइरल लोड परीक्षण गराइरहेका छन्।
यसैबीच, नेपालमा दैनिक झण्डै १.७ जना नयाँ संक्रमित थपिँदै गइरहेका छन् भने दिनमा एक जनाको मृत्यु एचआईभीका कारण हुने गरेको तथ्यांक केन्द्रले सार्वजनिक गरेको छ।
डा. शर्माले आगामी एक वर्षभित्र एचआईभी नियन्त्रण तथा रोकथामका लागि नयाँ राष्ट्रिय रणनीति आवश्यक रहेको निष्कर्ष समेत प्रस्तुत गरे।
