काठमाण्डौ । प्रहरी प्रधान कार्यालयले पाँच जना एसएसपीलाई डिआईजीमा बढुवाका लागि सिफारिस गरेको छ ।
जसमा पहिलो नम्बरमा भुपेन्द्रबहादुर खत्री, दोस्रो नम्बरमा सानुराम भट्टराई, तेस्रो नम्बरमा ओमप्रसाद अधिकारी, चौथो नम्बरमा शेखर अधिकारी र पाचौँ नम्बरमा अबिनारायण काफ्ले रहेका छन् । प्रहरी प्रधान कार्यालयमा गृह मन्त्रालयका सचिव रामेश्वर दंगालको अध्यक्षतामा बसेको बढुवा समितिले डीआईजी बढुवा सिफारिस गरेको हो ।
बढुवा समितिमा आईजीपी सदस्य र मानवश्रोत विकाश विभागका एआईजी सदस्य हुन्छन् । यसअघि विश्व अधिकारी र हाल विमानस्थल प्रहरी प्रमुख रहेका सोमेन्द्र सिंह राठौरको पनि नाम बढुवाको चर्चामा थियो । तर, जेनजी आन्दोलनमा बल प्रयोग गरेको विषयमा विवादमा तानिएका अधिकारीलाई जेनजी आन्दोलनकै बलमा बनेको सरकारले बढुवा रोकेको स्रोतको दावी छ ।
एसएसपी बढुवामा पहिलो नम्बरमा रहेका अधिकारी छुटेका हुन् । अधिकारी छुट्दा एसएसपी बढुवामा दोस्रो नम्बरमा रहेको भुपेन्द्र खत्री डिआईजीमा पहिलो नम्बरमा बढुवा भएका हुन् ।
