काठमाडौं— काठमाडौं महानगरपालिका–१४ स्थित कोहिनुर हाउजिङ नजिक सडक कटान भएपछि सो क्षेत्रका केही घरहरू उच्च जोखिममा परेका छन्। स्थानीय खोला किनारबाट भएको कटानले सडक भासिँदा आसपासका संरचनामा क्षति पुग्ने सम्भावना देखिएको हो।
काठमाडौं महानगरपालिकाका अनुसार शनिबार बिहान खोलाको छेउमा पहिरो जाँदा सडक भासिएको र त्यसले नजिकै रहेका बासिन्दाको घरहरू प्रभावित हुने खतरा बढेको छ। स्थिति नियन्त्रणमा लिन महानगर प्रहरी बल र विपद् व्यवस्थापन विभागको समन्वयमा नदी कटान रोक्ने प्रयास भइरहेको छ।
“खोलाले कटान गर्दा सडक भासिएको छ। थप क्षति रोक्नका लागि बोरा र ग्राभेल प्रयोग गरेर तत्कालीन उपायहरू अपनाइएको छ,” महानगरले जारी गरेको विज्ञप्तिमा उल्लेख छ।
हालसम्म मानवीय क्षतिको विवरण आएको छैन भने सुरक्षाका दृष्टिकोणले सम्भावित जोखिममा रहेका स्थानहरूको अनुगमन भइरहेको महानगरले जनाएको छ।
