काठमाडौँ । नेकपा एमाले गत मङ्सिर १४ गते बैतडीको झुला घाटबाट सुरु गरेको समृद्धि सङ्कल्प पदयात्रा आज मध्य पहाडको पूर्वी विन्दु चिवाभञ्ज्याङमा पुगेर समापन हुदै छ । सम्बन्ध स्थानीय, सन्देश राष्ट्रिय नाराका साथ १८ दिन अघि सुरु भएको अभियान आज समापन गरिने भएको हो ।
शनिवार पाँचथरको फिदिममा बसेको टोली आज(आइतबार) बिहान त्यहाँबाट चिवाभञ्ज्याङ जान लागेको हो। फिदिमबाट करिब ५० किलोमिटरको दुरीमा रहेको चिवाभञ्ज्याङमा पुगेर अध्यक्ष केपी शर्मा ओलीले नेपाल भारत सिमानामा राष्ट्रिय झण्डा फहराउनेछन् ।
३ हजार २ सय मिटर अग्लो यस ठाउँबाट पुनः फर्किएर साँझसम्ममा टोली फिदिम आइपुग्ने छ । मध्य पहाडका समस्याको पहिचान र समाधानका उपाय खोज्न यो पदयात्रा गरिएको एमालेको जिकिर छ ।
