काठमाडौं / सरकारले आर्थिक वर्ष २०७९/८० को बजेट मार्फत् सौन्दर्य प्रसाधन वस्तुको आयातमा १० प्रतिशत अन्तशुल्क बढाएको छ ।
सरकारले आयातलाई कडाइ गर्दै सौन्दर्य प्रसाधन वस्तुको आयातमा ५ प्रतिशत रहेको अन्तशुल्कलाई बढाएर १५ प्रतिशत पुर्याएको हो ।
सरकारले आगामी आर्थिक वर्षको विद्येयकमा लिपस्टिक, आइ मेकअपका वस्तु, नङपालिस, पाउडर, अनुहारमा लगाउने क्रिम, शरीरमा लगाउने लोसन, छालाको सुरक्षाका लागि प्रयोग गरिने खुद्रा बिक्री प्याकमा रहेको पेट्रोलियम जेली र स्याम्पुमा १० प्रतिशत अन्तशुल्क बढाएको हो ।
त्यसैगरी, सरकारले कपालमा लगाउने तेल, रङ, क्रिम, कन्डिसनर जस्ता वस्तुको आयातमा ५ प्रतिशत अन्तशुल्क बढाएर १० प्रतिशत बनाएको छ ।
सरकारले उच्च आयातका कारण विदेशी सञ्चिति घट्दै गएको र तरलता अभाव भएको भन्दै कस्मेटिक्स वस्तुको आयातमा शतप्रतिशत मार्जिनको व्यवस्था गर्दै प्रतिपत्र (एलसी) खोल्नुपर्ने व्यवस्था गरेको छ ।
अहिले बजारमा एलसीका कारण पर्याप्त मात्रामा कस्मेटिक्स वस्तु आउन नसकेको र मूल्य महँगिएका कस्मेटिक्स व्यवसायीहरूले बताएका छन् ।
नेपालले चालु आर्थिक वर्षको १० महिनामा मात्रै ७ अर्ब ४५ करोड ५९ लाख ७६ हजार रुपैयाँ बराबरको कस्मेटिक्स वस्तु आयात भएको छ । उक्त आयातित वस्तुबाट नेपाल सरकारले २ अर्ब ९५ करोड १८ लाख ८६ हजार रुपैयाँ भन्सार महशुल संकलन गरेको छ ।
नेपालले १० महिना मात्रै २९ करोड २१ लाख रुपैयाँको लिपिस्टिक, २० करोड ४६ लाख रुपैयाँको आइ मेकअप, ५९ करोड ५४ लाख रुपैयाँको फेस क्रिम, ४ करोड ८१ लाख रुपैयाँको नेलपोलिस, ४० करोड ५८ लाख रुपैयाँको बडी लोसन, २ अर्ब ५० करोड ३२ रुपैयाँको अन्य सौन्दर्य वस्तु, १ अर्ब ८६ लाख रुपैयाँको स्याम्पु, ४४ करोड ६९ लाखको कपालमा लगाउने रङ, ४४ करोड ६९ लाख रुपैयाँको कपालमा लगाउने तेल, १३ करोड २८ लाखको कन्डिसनर र ५६ करोड ५७ लाख रुपैयाँको कपालमा प्रयोग हुने अन्य वस्तु आयात भएको भन्सार विभागको तथ्याङ्कमा उल्लेख गरिएको छ ।
आयातित वस्तु नक्कली र मूल्य पनि निकै महँगी भएकाले आगामी दिनमा सौन्दर्य वस्तु नेपालमै उत्पादन गर्नुपर्ने भएपनि नेपालमा भने आयातित कस्मेटिक्स भन्दा आयुर्वेदिक कस्मेटिक्स उच्च रुपमा उत्पादन भइरहेको छ ।
