बिर्तामोड / बागमती प्रदेशका मुख्यमन्त्री तथा नेकपा एकीकृत समाजवादीका उपाध्यक्ष राजेन्द्र पाण्डे दुबई (युएई) बाट अरबौँ रुपैयाँ शंकास्पद कालोधन ल्याउने धन्दामा संलग्न रहेको खुलासा भएको छ ।
मुख्यमन्त्री पाण्डे अध्यक्ष रहेको नेपाल स्वास्थ्य सेवा सहकारी संस्था लिमिटेडले दुबइको युनिक कन्सल्ट लिमिटेडबाट ६९ अर्ब २१ करोड रुपैयाँ भन्दा बढी रकम नेपाल भित्र्याउन विवादास्पद सम्झौता गरेको खुलासा भएको हो ।
‘अन्डरवर्ल्ड डन’ भनेर चिनिने दाउद ईब्राहिमको स्वामित्व रहेको युनिक कन्सल्टबाट पाण्डेले नेपाल स्वास्थ्य सेवा सहकारीका लागि ६९ अर्ब २१ करोड रुपैयाँ भन्दा बढी रकम ल्याउने सम्झौता भएको फेला परेको हो ।
सन् २०२० सेप्टेम्बर १४ मा गरिएको उक्त सम्झौतामा सहकारीका तर्फबाट पाण्डेले हस्ताक्षर गरेका छन् भने युनिक कन्सल्टको तर्फबाट कम्पनीका प्रमुख कार्यकारी अधिकृत (सिइओ) मार्क एन्ड्रे जीले हस्ताक्षर गरेका छन् ।
सम्झौतामा हस्ताक्षर गर्ने कम्पनीको सिइओको पासपोर्ट भने बेल्जियमबाट जारी भएको बताइएको छ ।
उक्त कालो धन ओसार पसारमा नेपाल राष्ट्र बैकबाट ‘क’ बर्गको मान्यता प्राप्त लक्ष्मी बैँकको पनि संलग्नता रहेको खुलेको छ । उक्त रकम दुबईको अवुधावीमा मुख्यालय रहेको मशरेक बैंकबाट नेपालस्थित लक्ष्मी बैंक मार्फत नेपाल भित्र्याउने सम्झौतामा उल्लेख छ । सम्झौतामा बैंकका कर्मचारीको नाम र लक्ष्मी बैंककै स्विफ्ट कोड समेत प्रयोग गरिएको छ ।
पाण्डेले रकम ल्याउने सम्झौतामा हस्ताक्षर गरेको दुबईस्थित मशरेक बैंकमाथि अमेरिकाको न्युओर्कस्थित स्टेट डिपार्टमेन्ट अफ फाइनान्सियल सर्विसेज (डिएफएस)ले कारबाही गरेको थियो ।
कतार, बहराइन, कुवेत, बेलायत, न्युओर्क, हङकङ र मुम्बईमा शाखा कार्यालय रहेको मशरेक बैंकमा अन्तर्राष्ट्रिय आतङ्कवादी समुहको लगानी रहेको पाइएको छ ।
को हुन् दाउद इब्राहिम ?
‘अन्डरवर्ल्ड डन’ दाउद इब्राहिम भारतीय प्रहरीको मोस्ट वान्टेड लिस्टमा रहेका डन हुन् ।
सन् १९९४ मा देखि उनी प्रहरीको मोस्ट वान्टेड सुचीमा रहेका छन् । अमेरिकाले समेत दाउद इब्राहिमलाई विश्वस्तरीय आतङ्कवादीहरूको सूचीमा राखेको छ ।
दाउद सन् १९९३ मा मुम्बईमा भएको शृंखलाबद्ध बम विस्फोटनका योजनाकार ‘डी कम्पनी’ का मुख्य नाइके हुन् । बम आक्रमणमा झण्डै २६० जना मारिएका थिए भने सात सय जना घाइते भएका थिए ।
पाकिस्तान र दुबईमा लुकेर बस्दै आइरहेको चर्चा बेलाबेलामा चलिरहन्छ । उनको क्यारेक्टरलाई नै लिएर बलिउडमा धेरै फिल्महरू समेत बनेका छन् ।
भारत र अमेरिकाले सन् २००३ मा दाउदलाई पकड्ने व्यक्तिलाई दुई अर्ब ५० लाख (२५ मिलियन अमेरीकी डलर) दिने घोषणा समेत गरेका थिए ।
दाउदको जन्म २७ डिसेम्बर १९५५ मा महाराष्ट्रको रत्नगिरी मा भएको थियो । उनका तीन जना छोराछोरी छन् जसमा दुई जना छोरी र एक जना छोरा रहेका छन् ।
दाऊद इब्राहिमकी पत्नी जुबाना जरीनलाई महजम्बी शेख भनेर चिनिन्छ । यद्यपि जुबीनाको बारेमा कमै मानिसलाई थाहा छ । उनको तस्बिर पनि निकै कम देखिन्छन् । तर जुबीना भिन्डी बजार मुम्बईमा बस्ने गर्छिन् ।
मुम्बईको यहि ठाउँमा दाऊदले आफ्नो बाल्यकाल बिताएका थिए । दाऊदका पिताका भाइ सलीम कश्मीरी आजसम्म पनि यहि इलाकामा बस्दै आएका छन् ।