धनगढी / गठबन्धनका दलहरूबीच भएको सहमतिलाई लत्याउदै जनता समाजवादी पार्टी (जसपा) सुदूरपश्चिममा गठबन्धनबाट बाहिरिएको छ ।
नेपाली कांग्रेसलाई मात्र सरकारमा सहभागी गराएर आफ्नो अपमान गरेको भन्दै शनिबार धनगढीमा एक पत्रकार सम्मेलनमार्फत जसपाले गठबन्धनबाट बाहिरिने घोषणा गरेको हो ।
केन्द्रले पाँच दलीय गठबन्धन प्रदेश तथा स्थानीय स्तरमा विस्तार गर्दै अगाडि बढ्ने निर्देशन दिएपनि जसपालाई पछाडि पार्दै अन्य दल अगाडि बढेपछि गठबन्धनबाट बाहिरिएको जसपा सुदूरपश्चिमका अध्यक्ष कृष्णकुमार चौधरीले बताएका छन् ।
नेपाली कांग्रेस, नेकपा माओवादी केन्द्र र नेकपा एकीकृत समाजवादी पार्टीले कुनै जानकारी नै नदिई कांग्रेसलाई सरकारमा सहभागी गराएपछि कुनै दलसँग पनि गठबन्धन नगर्ने भएको थियो ।
स्थानीय तह निर्वाचनका लागि एक्लै लड्न सक्ने दाबी गरेको जसपा आवश्यकता अनुसार अन्य पार्टीसँग मिलेर अगाडि बढ्न तयार रहेको समेत चौधरीले बताएका छन् ।
सुदूरपश्चिम प्रदेश सभामा समाजवादीका १४, नेकपा (माओवादी केन्द्र) का १३, नेपाली कांग्रेसका १२, नेकपा (एमाले)का १० र जनता समाजवादी पार्टीका २ जना सांसद रहेका छन् । .
