विराटनगर / आगामी बैशाख ३० मा हुने स्थानीय तहको निर्वाचनका लागी मोरङको सुन्दरहरैंचा नगरपालिकाको मेयर पदमा डा. प्रकाश भट्टराईले स्वतन्त्र उम्मेदवारी दिएका छन् । सुन्दरहरैंचा नगरपालिका-५ का भट्टराईले राजनीतिक दलभन्दा बाहिर रहेर स्वतन्त्र उमेदवारको रुपमा उम्मेदवारी घोषणा गरेका हुन् । बिभिन्न क्षेत्रमा ज्ञान हासिल गरिसकेका उनले बुधबार पत्रकार सम्मेलन गरेर आफ्नो उम्मेदवारी बारे धारणा सार्वजानिक गरेका थिए ।
नगरपालिका प्रमुख पदमा बिजयी भएमा म जन्मे हुर्केको सुन्दरहरैँचालाई अझै बढि सुन्दर र व्यवस्थित बनाउने सपनालाई मूर्तरूप प्रदान गर्न यहाँहरूको भरपर्दो साथ, सहयोग र समर्थनको अपेक्षा गरेको छु मेयर पदका आकांक्षी भट्टराईले भने । सामाजिक अभियन्ता, नीतिविश्लेषक तथा अनुसन्धानकर्ताको परिचय बनाएका भट्टराई लोकतन्त्र, सुशासन तथा सामाजिक न्यायको अभियानमा नेतृत्वदायी र व्यवसायिक भूमिकामा विगत २० वर्षदेखि अनवरत क्रियाशील रहेका छन् ।
