उदयपुर / उदयपुरको उदयपुरगढी गाउँपालिका -१ मा आगलागीबाट ८ घर जलेर नष्ट भएको छ भने १ जना महिला आगोमा परी जलेर मृत्यु भएको छ । मृत्यु हुनेमा स्थानीय ६६ वर्षीया शिवमाया मगर रहेकी छिन् ।
आइतबार बेलुका ४ बजे स्थानीय गौर बहादुर मगरको फुसको छानो भएको २ तले घरबाट विद्युत सर्ट भई आगलागी सुरु भएको थियो । मगरको घरबाट सुरु भएको आगो फैलिएर नजिकै रहेको शेर बहादुर मगर, भैरव मगर, यलम्बर बहादुर मगर, मनमाया मगर, पदम बहादुर मगर, दीप बहादुर मगर र धन माया मगरको घर समेत जलेर नष्ट भएको छ ।
स्थानीय र प्रहरीको सहयोगमा राती साढे ८ बजे आगो नियन्त्रणमा आएको थियो भने आगलागीबाट अन्दाजी १ करोड २१ लाख बराबरको क्षति भएको छ । आगलागीको घटना सम्बन्धमा थप अनुसन्धान भइरहेको जिल्ला प्रहरी कार्यालय उदयपुरले जानकारी दिएको छ ।
