इटहरी / प्रधानमन्त्री शेरबहादुर देउवाले लेटाङमा एक महिला प्रहरीको ज्यान जाने गरी भएको घटनाका दोषीलाई कारबाही गरिने बताएका छन् ।
लेटाङ घटनाको छानबिन गरी महिला प्रहरी हत्या भएको घटनामा संलग्नलाई कारबाही गर्न उनले प्रहरीलाई निर्देशन दिएको पनि बताएका छन् । मोरङको सुन्दर हरैँचा नगरपालिकामा आयोजित कार्यक्रमलाई सम्बोधन गर्दै प्रधान मन्त्री देउवाले लेटाङ घटनाका विषयमा आफ्नो धारणा सार्वजनिक गरेका हुन् ।
चुनाव हुनेमा आशंका नगर्न आग्रह गर्दै उनले तोकिएकै समयमा स्थानीय निकायको निर्वाचन हुने समेत उल्लेख गरेका छन् । कार्यक्रममा पूर्व स्वास्थ्य मन्त्री भानुभक्त ढकालले सरकारले चुनाव गराउनेमा शंका व्यक्त गरेपछि देउवाले चुनाव हुनेमा ढुक्क रहन आग्रह गरेका हुन् ।प्रधानमन्त्री देउवाले सुन्दरहरैँचा नगरपालिका वडा नम्बर ८ मा नगरपालिकाले प्रशासनिक भवनको शिलान्यास समेत गरेका छन् । नगरपालिकाको प्रशासनिक भवन करिब २७ करोड लागतमा निर्माण हुने नगर प्रमुख शिवप्रसाद ढकालले जानकारी गराएका छन् ।
