झापा / सङ्खुवासभाको मादी नगरपालिका –६ मा भएको बस दुर्घटनामा मृत्यु हुनेको संख्या १५ पुगेको छ ।
मादीको ओखरबोटेबाट झापाको दमकतर्फ आँउदै गरेको बा ४ ख ७३५ नम्बरको बस दुर्घटना हुँदा घटनास्थलमा १४ जनाको र उपचारका क्रममा धरानमा एक जनाको गरी १५ जनाको मृत्यु भएको जिल्ला प्रहरी कार्यालयले जानकारी दिएको छ ।
दुर्घटनामा मादी नगरपालिका –६ का ३८ वर्षीय इन्द्रबहादुर अधिकारी, ३० वर्षीया सीता वि क, ५ वर्षीया दीक्षा कटवाल, ३२ वर्षीया अञ्जना कटवाल, मादी नगरपालिका –५ का ४५ वर्षीय दीपक दाहाल, ५२ वर्षीय श्याम शेर्पा, ५५ वर्षीय भवानी दाहालको घटनास्थलमै मृत्यु भएको छ ।
घटनास्थलमै मृत्यु हुनेहरूमा मादी नगरपालिका –४ का अन्दाजी ३५ वर्षीय उमेश भट्टराई, ३८ वर्षीय आइतबहादुर तामाङ, ३५ वर्षीय सविता राउत कार्की, ६० वर्षीय बलबहादुर कार्की, तेह्रथुम औशीडाँडाका ३५ वर्षीय विपिन निरौला, ताप्लेजुङकी ३१ वर्षीय समीक्षा योन्जन र ताप्लेजुङकै ८ वर्षीय सुदीप घिसिङ पनि रहेका छन् ।
त्यस्तै मादी नगरपालिका-५ कि ३० वर्षकी यूका पोखरेलको विपी कोइराला स्वास्थ्य विज्ञान प्रतिष्ठानमा उपचारका क्रममा मृत्यु भएको प्रहरीले जानकारी दिएको छ ।
उनीहरूलाई घटनास्थलबाट नेपाली सेनाको हेलिकप्टरले उद्धार गरेर बीपी कोइराला स्वास्थ्य विज्ञान प्रतिष्ठान धरान लगेको थियो ।
जिल्ला प्रहरी कार्यालय संखुवासभाका प्रहरी नायब उपरीक्षक लालध्वज सुवेदीले प्रारम्भिक अनुसन्धानका क्रममा तीब्र गतिमा रहेको बस अनियन्त्रित भएर दुर्घटना भएको देखिएको बताउँछन् ।
