बिर्तामोड / झापाको दमक ५का दिनेश सिक्देलको हत्या गरेको अभियोगमा प्रहरीले दुई जनालाई पक्राउ गरी सार्वजनिक गरेको छ । सिक्देलकी कान्छी श्रीमती ३० वर्षीया अनिता केसी र उनका प्रेमी २९ वर्षीय सरोज भण्डारीलाई पक्राउ गरी मंगलबार सार्वजनिक गरिएको प्रहरीले जनाएको हो ।
योजनावद्ध रुपमा प्रेमीसँग मिलेर अनिताले श्रीमानको हत्या गरेको अनुसन्धानका क्रममा खुलेको प्रहरी उपरीक्षक सञ्जय सिंह थापाले जानकारी दिएका छन् । अनिता र सरोजले सिग्देलको विभत्स तवरले हत्या गरी धरान ४ सडकखण्डको जङ्गलमा जेब्रा झोलामा हालेर फ्याँकिएको अवस्थामा शव फेला परेको थियो ।
गत बुधबार सिक्देलको टाउको र दाहिने खुट्टा जेब्रा झोलामा फेला परेको थियो भने, त्यसको भोलिपल्ट अर्को जेब्रा झोलामा बाँकी शरीर फेला परेपछि प्रहरीले अनुसन्धान अघि बढाएको थियो । प्रहरीले हत्यामा संलग्न अनितालाई सोमबार नै नियन्त्रणमा लिएको थियो ।
सिग्देलकी जेठी श्रीमतीको बयानका आधारमा प्रहरी अनिता र सरोजलाई पक्राउ गर्न सफल भएको हो । दुवै जनाले सिग्देलको हत्या गरेको स्वीकारेको प्रहरीले जनाएको छ ।
