झापा / उदयपुरको बेलका नगरपालिका ८ सिरुवानीबाट ठुलो परिणामको नियन्त्रित लागूऔषध गाँजा सहित ३ जनालाई प्रहरीले पक्राउ गरेको छ ।
लागूऔषध गाँजाको ओसार पसार तथा कारोबार भइरहेको भन्ने विशेष सूचनाको आधारमा इलाका प्रहरी कार्यालय रामपुर ठोक्सिलाबाट खटिएको प्रहरी टोलीले हिजो बिहान सवा २ बजे ४ सय के .जी गाँजा सहित ३ जनालाई पक्राउ गरेको हो ।
पक्राउ पर्नेहरुमा बेलका नगरपालिका -८ का २७ वर्षीय गोकुल राई, बेलका नगरपालिका -७ का २९ वर्षीय मनोज राई र बराहक्षेत्र नगरपालिका -१ सुनसरीका २३ वर्षीय मनिष धामी रहेका छन् ।
उनीहरूलाई को १ ज २७६१ नम्बरको पिकअपमा गाँजा ओसार पसार गरिरहेको अवस्थामा पिकअप सहित पक्राउ गरिएको हो । उनीहरूको साथबाट प्रहरीले नगद ६३,०२५ समेत बरामद गरेको छ । गाँजा सहित पक्राउ परेका उनीहरूको सम्बन्धमा प्रहरीले थप अनुसन्धान गरिरहेको छ ।
