झापा / सङ्खुवासभा जिल्लाको खाँदबारी नगरपालिका –९ तुम्लिङटारमा ट्रक दुर्घटना हुँदा एकजनाको मृत्यु भएको छ । मृत्यु हुनेमा गोरखा नगरपालिका –४ का २२ वर्षीय ट्रक चालक मिलन मंग्राती रहेको जिल्ला प्रहरी कार्यालय संखुवासभाका प्रहरी निरीक्षक शुभेष अधिकारीले जानकारी दिए ।
तुम्लिङटारबाट वीरगञ्ज जाँदै गरेको ट्रक दुर्घटना हुँदा चालक मंग्रातीको घटनास्थलमै मृत्यु भएको प्रहरी निरीक्षक अधिकारीले बताए । सोमबार बिहान ७ बजे प्र २०३००१ ख ४३० नम्बरको ट्रक खाँदबारी –९ सभाखोला नजिकै भएको हो ।
ट्रक मकालु गाउँपालिका –५ को नुममा सिमेन्ट पुर्याएर सोमबार बिहान वीरगञ्ज फर्कँदै गर्दा सभाखोला नजिकैको घुम्तीमा ब्रेक फेल भएर दुर्घटनामा परेको प्रहरी निरीक्षक अधिकारीले बताए ।
घटनाको थप अनुसन्धान भइरहेको जिल्ला प्रहरी कार्यालय संखुवासभाले जनाएको छ । मृतक मग्रातीको शव पोस्टमार्टमका लागि जिल्ला अस्पताल सङ्खुवासभा ल्याउने तयारी भइरहेको प्रहरी निरीक्षक अधिकारीले बताए ।
