जनकपुरधाम / मधेश प्रदेशमा हावाहुरी सहित भएको वर्षाका कारण तीन जनाको मृत्यु भएको छ । बिहीबार रातिदेखि सुरु भएको वर्षा सहितको हावाहुरीमा परी तीन जनाको मृत्यु भएको प्रदेश प्रहरी कार्यालय जनकपुरले जनाएको हो ।
हावाहुरीले रूख ढल्दा धनुषामा दुई विद्यार्थी र घर ढल्दा रौतहटमा एक महिलाको मृत्यु भएको प्रहरीले जनाएको छ । धनुषाको सबैला नगरपालिका—१२ स्थित फकिरचन्द उच्च माविको प्राङ्गणमा रहेको रूख ढल्दा ८ वर्षीया प्रतिमा कुमारी सदा र ७ वर्षीय अरबन्दी सदाको मृत्यु भएको धनुषाका एसपी बसन्त रजौरेले जानकारी दिएका छन् । उनका अनुसार हावाहुरीले अचानक मसालाको रूख ढल्दा दुबै जनाको टाउकोमा चोट लागि घटनास्थलमै मृत्यु भएको थियो ।
यस्तै, रौतहटको बौधीमाई नगरपालिका—१ स्थित इँटाको घर खस्दा ४५ वर्षीया फुलमतीया देवीको मृत्यु भएको जिल्ला प्रहरी कार्यालय रौतहटले जनाएको छ ।
शुक्रबार बिहानैदेखि देशका अधिकांश जिल्लामा वर्षा भइरहेको छ ।
