काठमाडौँ / नेपालले अफगानिस्तानका जनताका लागि औषधि र लत्ताकपडा पठाएको छ ।
आज त्रिभुवन अन्तर्राष्ट्रिय विमानस्थलमा पत्रकार सम्मेलन गर्दै परराष्ट्र मन्त्री नारायण खड्काले अफगानिस्तानमा मानवीय संकट उत्पन्न भएकोले नेपालले सहयोग गरेको बताए ।
मन्त्री खड्काका अनुसार नेपालले जहाजमार्फत आवश्यक सामग्री अफगानिस्तान पठाएको छ ।
हिमालय एयरलाइन्सको जहाजमार्फत औषधि, लत्ताकपडा र घरायसी सामग्री गरी करिब १४ टन सामग्री अफगानिस्तान पठाइएको हो ।
जहाज अब करिब साढे ३ घन्टामा काबुलस्थित विमानस्थलमा पुग्नेछ ।
परराष्ट्र मन्त्री खड्काका अनुसार अफगानिस्तानका करिब २ करोड ७० लाख मानिस मानवीय सहयोगको पर्खाइमा छन् ।
‘अफगानी जनताका लागि अन्तर्राष्ट्रिय सहयोग यतिबेला ठप्प भएको अवस्थामा नेपालले मानवीय सहयोग पुर्याउनुपर्छ भनेर विशेष जहाजबाट आज सामग्री पठाउन लागेका हौं,’ उनले भने, ‘सरकारलाई कुनै व्ययभार नपारी निजी क्षेत्रकै सहयोगबाट हामीले इतिहासमै पहिलोपटक यस्तो सहयोग गर्न लागेका छौं।’
प्राकृतिक प्रकोपमा नेपाल परेका बेला विभिन्न देशबाट सहयोग लिएको स्मरण गर्दै उनले नेपालले पनि परेका बेला सहयोग गर्न सक्ने बताए ।
‘हामी सहयोग गर्न पनि सक्छौँ भन्ने सन्देश दिनुछ। नेपालले परेका बेला अन्य राष्ट्रलाई सहयोग गर्ने सामर्थ्य राख्छ,’ उनले भने, ‘यो प्रयासबाट नेपालको छवि र प्रतिष्ठा अन्तर्राष्ट्रिय समुदायमा बढ्छ भन्ने विश्वास छ ।’
जहाज काबुलमा अवतरण गरेपछि त्यहाँ संयुक्त राष्ट्रसंघको गाडी आउने र उक्त गाडीबाट सामग्री लगेर हस्तान्तरण गरिने मन्त्री खड्काले बताए ।
औषधिलगायत सामग्री बोकेको जहाजमा नेपालका तर्फबाट मन्त्रालयकी सहसचिव सेवा लम्साल, मन्त्रालयका कर्मचारी, उद्योगी तथा व्यवसायीहरू र पत्रकारहरू रहनेछन् ।
‘संयुक्त राष्ट्रसङ्घले त्यहाँ आवश्यकता परेको सामग्रीको लिस्ट दिएअनुसार नै औषधि, लत्ताकपडा लगायतका सामग्री हामीले पठाएका छौं,’ उनले भने, ‘त्यहाँ जाडो छ, त्यसैले पनि लत्ताकपडा पठाइएको हो ।’
केही महिनाअघि तालिबानले सत्ता कब्जा गरेको मुलुक अफगानिस्तानमा मानवीय संकट उत्पन्न भएपछि नेपालले सहयोग गरेको हो ।
