झापा / बाल यौन दुर्व्यवहारको आरोपमा एक शिक्षकलाई प्रहरीले पक्राउ गरेको छ ।
जिल्ला प्रहरी कार्यालय रामेछापका अनुसार आइतबार आफ्नै विद्यार्थीलाई जबरजस्ती करणी गर्ने उद्देश्यले यौन दुराचारको आरोपमा सप्तरीको बलनबेहाल गाउँपालिका वडा नम्बर - २ चण्डी घर भएका ३८ वर्षीय शिक्षक दिनेश कुमार गुप्तालाई पक्राउ गरिएको हो ।
उनलाई आइतबार दिउँसो ४ बजे मन्थली नगरपालिका वडा – ११, गेलु बजारबाट पक्राउ गरिएको जिल्ला प्रहरी कार्यालय रामेछापका सूचना अधिकारी श्री शंकर श्रेष्ठले जानकारी दिएका छन । आरोपित शिक्षक गुप्तालाई पक्राउ गरी घटनाबारे थप अनुसन्धान भइरहेको श्रेष्ठको भनाइ छ ।
यस्तो छ घटनाको विवरण
आइतबार बिहानै विद्यालयको बाटो भएर बजारमा दूध बेच्न गएर फर्कदै गरेको समयमा गुप्ताले १५ वर्षीय ती बालिकालाई जबरजस्ती करणीको प्रयास गरेको प्रहरीको भनाइ छ । गुप्ताले विज्ञान विषयको उत्तरपुस्तिका देखाउने बहानामा आफू बस्दै आएको कोठासम्म ती बालिकालाई पुर्याएको बताइन्छ ।
उत्तरपुस्तिका देखाउँदै गुप्ताले बालिकाको संवेदनशील अङ्गहरूमा छुने र चलाउने काम गर्न थालेपछि ती बालिकाले प्रतिकार गरेको तर पनि गुप्ताले नछोडेपछि बालिकाले बल प्रयोग गरेर धक्का दिएर त्यहाँबाट भाग्न सफल भएको प्रहरीको भनाइ छ ।
आइतबार बिहान भएको सो घटनाबारे उनले परिवारको सदस्यहरू कसैलाई पनि नभनेको प्रहरीको भनाइ छ । प्रहरीका अनुसार गुप्तालाई धक्का दिएर घटनास्थलबाट भागेकी ती बालिका सरासर घर पुगिन् र आफ्नो नियमित काममा लागिन् । उनी दिउँसो विद्यालय गइन् । विद्यालय पुगेपछि उनले बिहानको घटनाबारे आफ्नो साथीलाई सुनाइन् । उनकी साथी मार्फत् सो घटना बालिकाको घरसम्म पुग्यो । उनकी साथीले सबैभन्दा पहिले पीडित बालिकाको आमालाई घटनाबारे जानकारी गराइन् ।
घटनाबारे जानकारी प्राप्त भए लगत्तै उनी बालिकासहित जिल्ला प्रहरी कार्यालय रामेछाप पुगिन् र प्रहरीलाई घटनाबारे जानकारी गराइन् । बालिका र बालिकाको आमाको उजुरीका आधारमा गुप्तालाई गेलु बजारमा हिँड्दै गरेको अवस्थामा प्रहरीले फेला पारेर पक्राउ गरेको हो ।
गुप्ता उपर बाल यौन दुराचारको मुद्दा दायर गरी अनुसन्धान कार्य भइरहेको प्रहरीले जनाएको छ ।
