राँझा / पूर्व–पश्चिम राजमार्गमा सवारीसाधनलाई रोकेर जबर्जस्ती लुटपाट गर्न खोज्ने समूहलाई प्रहरीले पक्राउ गरेको छ । पक्राउ पर्नेमा दुर्गा टमटा, सन्तोष पहाडी लगायत सात जना रहेका छन् ।
उनीहरूले अगैयाभन्दा पूर्वतर्फ सिक्टा, गाभर जङ्गलमा गाडी रोकेर जबर्जस्ती पैसा मागेको र नदिए ज्यान मार्ने धम्की दिएपछि कार र ट्रकका चालकले अगैया प्रहरी चौकीमा खबर गरेका थिए ।
सो घटनाको बारेमा जानकारी पाएलगत्तै अगैया प्रहरी चौकीबाट खटिएको टोलीले उनीहरूलाई पक्राउ गरेको अगैयाका प्रहरी सहायक निरीक्षक खगेन्द्र केसीले जानकारी दिए ।
लुटपाटमा संलग्न उनीहरु बा१४च ३३०३ नंको कारमा सवार रहेको प्रहरीले जनाएको छ । उनीहरूलाई कारबाहीका लागि इलाका प्रहरी कार्यालय कोहलपुरलाई बुझाइएको छ ।
