झापा / पूर्व रुकुम पश्चिमको बाँफिकोट गाउँपालिका –९ की २६ वर्षीया कमला खनालको हत्या को आरोपमा उनको श्रीमान २५ वर्षीय दीपक ( दलजित ) खनाललाई प्रहरीले पक्राउ परेका छ ।
जिल्ला प्रहरी कार्यालयका प्रहरी निरीक्षक डेकेन्द्र शर्माका अनुसार विवाद हुँदा दीपकले शुक्रबार राति कमलाको घाँटी थिचेर हत्या गरी झुन्ड्याएको स्वीकारेको बताए ।
दुवैजना बीच वादविवाद बढ्दै जाँदा दीपकले घाँटी थिचेर हत्या गरेको प्रारम्भिक अनुसन्धानबाट खुलेको छ‚’ प्रहरी निरीक्षक शर्माले भने‚ ‘थप अनुसन्धान पनि हुँदैछ ।’
कमलाको शव आफ्नै कोठामा आफ्नै सलले झुण्डिएको अवस्थामा फेला परेको थियो। चार महिने छोरा र दीपक पनि साथै रहेका बेला भएको कमलाको मृत्यु सामान्य नभएको भन्दै प्रहरीले दीपकलाई घटना स्थलबाटै नियन्त्रणमा लिएको थियो। दीपकले नै श्रीमतीले आत्महत्या गरेको भनेर छिमेकीलाई खबर गरेका थिए ।
अनुसन्धानका क्रममा दीपकले घाँटी थिचेर श्रीमतीको हत्या गरेर उनकै सल प्रयोग गरेर झुन्ड्याएको खुल्न आएको प्रहरीले जनाएको छ। प्रहरीले दीपकमाथि थप अनुसन्धान गर्ने भन्दै रुकुम पश्चिम जिल्ला अदालतबाट आइतबार १० दिनको म्याद थप गरेको छ ।
