इस्लामाबाद— पाकिस्तानको खैबर पख्तुनख्वा प्रान्तअन्तर्गत पर्ने उत्तर वजिरिस्तान जिल्लामा सुरक्षा बलले सञ्चालन गरेको विशेष कारबाहीमा २७ जना आतङ्ककारी मारिएका छन्। पाकिस्तानी सेनाको जनसम्पर्क विभाग (आईएसपीआर) ले पछिल्लो ७२ घण्टामा गुप्तचर सूचनाका आधारमा उक्त अभियान सञ्चालन गरिएको जनाएको हो।
सेनाका अनुसार मिरान शाह क्षेत्रका विभिन्न आतङ्ककारी लुक्ने स्थलहरूलाई लक्षित गरी गरिएको कारबाहीका क्रममा सुरक्षा बल र आतङ्ककारीबीच भीषण भिडन्त भएको थियो। सो क्रममा २७ जना आतङ्ककारी मारिएका हुन्।
अभियानपछि घटनास्थलबाट ठूलो परिमाणमा हतियार तथा गोलाबारुद बरामद गरिएको सेनाले जनाएको छ। मारिएका व्यक्तिहरू नागरिकमाथि हुने हिंसात्मक गतिविधि र आतङ्कवादी हमलामा संलग्न रहेको दाबी गरिएको छ।
यसैबीच, स्थानीय प्रभावशाली व्यक्ति मलिक सैफुल्लाह दावरको हत्यामा संलग्न व्यक्तिहरूलाई लक्षित गरी कारबाही गरिएको सेनाले उल्लेख गरेको छ। उक्त घटनाको प्रतिशोधस्वरूप सञ्चालन गरिएको अभियान सफल भएको सेनाको भनाइ छ।
सुरक्षा निकायले क्षेत्रलाई पूर्ण रूपमा आतङ्कमुक्त बनाउन थप खोज तथा सफाइ अभियान जारी रहेको जनाएको छ। यो अभियान पाकिस्तानको आतंकवादविरुद्धको निरन्तर प्रयासअन्तर्गत सञ्चालन गरिएको बताइएको छ।
