काठमाण्डौ । सशस्त्र प्रहरी बलमा रिक्त रहेको ७७ पदमा जेष्ठता, कार्यसम्पादन मूल्यांकन र व्यवसायिक क्षमतालाई समेत आधारमानी बढुवा सिफारिस गरिएको छ।
रिक्त पदमा सशस्त्र प्रहरी बरिष्ठ उपरीक्षकमा ६ जना, सशस्त्र प्रहरी उपरीक्षकमा २२ जना, प्राविधिक सशस्त्र प्रहरी उपरीक्षकमा १ जना र सशस्त्र प्रहरी नायव उपरीक्षकमा ४८ जनालाई सोमबार बढुवा सिफारिस गरिएको हो।
जेष्ठता तथा व्यावसायिकक्षमता तथा कार्यसम्पादन मुल्यांकन लगायतलाई प्राथमिकतामा राखी खाली रहेको रिक्त पदमा बढुवा गरिएको र यसले संगठनको बृत्तिविकास र सुरक्षा फौजको मनोवलमा हौसला बृद्धि हुने विश्वास गरिएको शसस्त्र प्रहरीले जनाएकाे छ।
सशस्त्र प्रहरी बरिस्ठ उपरीक्षमा बढुवा सिफारिसमा दोश्रो ब्याचको पहिलो चरणमा सशस्त्र प्रहरी उपरीक्षकमा बढुवा भएकाहरु रहेका छन् भने उपरीक्षकमा बढुवा सिफारिस भएकाहरु तेश्रो ब्याच, सोही ब्याचका बैकल्पिक समुहमा परेका तथा चौथो ब्याचबाट जेष्ठता, व्यावसायिक क्षमता तथा कार्य सम्पादन मूल्यांकनलाई समेत आधार मानेर गरिएको छ। यस्तै सशस्त्र प्रहरी नायब उपरीक्षकमा बढुवा सिफारिस भएका अधिकृतहरु ९ औं ब्याचका रहेका छ्न्।
मुख्यालयले बढुवा हुनको लागि असार ३२ गते सूचना जारी गर्दै सशस्त्र प्रहरी बरिष्ठ उपरीक्षक, सशस्त्र प्रहरी उपरीक्षक, प्राविधिक सशस्त्र प्रहरी उपरीक्षक र सशस्त्र प्रहरी नायव उपरीक्षकमा १५ दिनभित्र बढुवा फारम भरी बढुवा समितिको सचिवालयमा पेश गर्न भनिएको थियो।
बढुवा मूल्यांकन फारामको लागि योग्य उम्मेदवारले आफुले प्राप्त गरेको शैक्षिक योग्यता र बढुवा प्रयोजनार्थ आवश्यक पर्ने प्रमाणपत्रहरुको प्रतिलिपिहरु संलग्न गरी बढुवा समितिको सचिवालयमा पेश गर्न समेत भनिएको थियो।
बढुवा समितिको निर्णयअनुसार सशस्त्रका ६ जना प्रहरी उपरीक्षक (एसपी)लाई प्रहरी वरिष्ठ उपरीक्षक (एसएसपी)मा बढुवा सिफारिस गरिएको हो ।
सशस्त्र प्रहरीका २२ डीएसपीलाई एसपीमा बढुवा सिफारिस गरिएको छ । एसपी बढुवा हुनेको एक नम्बरमा नरदीप कुमार बस्नेत छन् ।
४८ जना सशस्त्र प्रहरी निरीक्षक (इन्स्पेक्टर)लाई प्रहरी नायब उपरीक्षक(डीएसपी)मा बढुवा सिफारिस गरिएको छ । प्राविधिक सशस्त्र प्रहरी नायब उपरीक्षक (डीएसपी) मनोज बछुण्डे श्रेष्ठलाई प्रहरी उपरीक्षक पद (एसपी)मा बढुवा सिफारिस गरिएको छ । 
