बिर्तामोड / नेपाली कांग्रेस, नेकपा (माओवादी केन्द्र) र नेकपा एकीकृत समाजवादीसहितको लोकतान्तिक–वाम गठबन्धनले झापा क्षेत्र नम्बर ५ को साझा प्रतिवद्धतापत्र सार्वजनिक गरेको छ ।
गठबन्धनका उम्मेदवारहरूले दमक –६ सिद्धि मार्केटस्थित गठबन्धनको निर्वाचन प्रचार कार्यालयमा शुक्रबार एक कार्यक्रमको आयोजना गरि ४० बुँदे प्रतिवद्धतापत्र सार्वजनिक गरेको हो ।
क्षेत्र नम्बर –५ मा गठबन्धनको तर्फबाट उम्मेदवार बनेका प्रतिनिधिसभाको प्रत्यक्ष तर्फ डा. खगेन्द्र पाण्डव अधिकारी, समानुपातिकमा अईन्द्र विक्रम केरुङ, प्रदेशसभामा प्रत्यक्ष तर्फ गगन पुरीले चुनावी प्रतिबद्धता सार्वजनिक गरेका हुन् ।
प्रतिनिधिसभा र प्रदेशसभा सदस्यको निर्वाचनलाई लक्षित गरी जारी गरिएको प्रतिवद्धता पत्रमा यस क्षेत्रको शिक्षा र स्वास्थ्यलाई पहिलो प्राथमिकतामा राखिएको छ ।
प्रतिबद्धताहरू सार्वजनिक गर्दै प्रतिनिधिसभाका उम्मेदवार डा. अधिकारीले यस क्षेत्रमा रहेका सामुदायिक विद्यालयहरूको गुणस्तर सुधारका साथै यसै क्षेत्रमा मेडिकल कलेज सञ्चालन गर्ने बताएका छन् ।
त्यस्तै प्रदेशसभा (२) का उम्मेदवार पुरीले झापाको कमल गाउँपालिकामा रहेको आदिवासी रङ्गशालालाई अत्याधुनिक रुपमा निर्माण सम्पन्न गर्ने प्रतिबद्धता जनाए ।
