झापा / नेकपा माओवादी केन्द्र निकट विद्यार्थी संगठन अखिल (क्रान्तिकारी)ले चुनाव लक्षित ‘क्रान्तिकारी फोर्स’ गठन गर्ने भएको छ ।
अखिल (क्रान्तिकारी)ले मंसिर ४ मा हुने संघ र प्रदेशको निर्वाचनका दौरान सङ्गठनलाई देशव्यापी व्यवस्थित र प्रभावकारी बनाउन क्रान्तिकारी फोर्स गठन गर्ने भएको हो ।
त्यसका लागि अखिलले भदौ २२ गते बिहान १० बजे राष्ट्रिय सभागृहमा एक कार्यक्रमको आयोजना गरेको छ । उक्त कार्यक्रमको उद्घाटन पार्टी अध्यक्ष प्रचण्डले गर्ने अखिल (क्रान्तिकारी)का उपाध्यक्ष अमरजंग शाहीले जानकारी दिए ।
‘क्रान्तिकारी फोर्स’ अखिल (क्रान्तिकारी) केन्द्रीय समिति मातहत रहने नयाँ संरचना हुने बताइएको छ । कार्यक्रममा अध्यक्ष पञ्चा सिंह सहित केन्द्रीय पदाधिकारीहरू, प्रदेश पदाधिकारीहरू सहित मुलुकभरका सबै तहका नेता कार्यकर्ताहरूको प्रतिनिधिमूलक सहभागिता रहने उनले बताए ।
