देशभरका ठूला २० अस्पतालले २० जिल्लामा विशेषज्ञ सेवा दिने

काठमाडौं / अब देशभरका ठूला २० अस्पतालले नेपालका बिभिन्न २० वटा अस्पतालमा विशेषज्ञ शल्यचिकित्सा सेवा दिने  भएको छ । स्वास्थ्य तथा जनसंख्या मन्त्रालयले यसका लागि केही मेडिकल कलेजसँग सम्झौता गरिसकेको छ भने केही प्रक्रियामा रहेका छन् ।

मन्त्रालयले राष्ट्रिय चिकित्सा ऐन २०७५ को दफा २० र राष्ट्रिय चिकित्सा शिक्षा नियमावलीको दफा ४० अनुसार जिल्लाका अस्पतालमा गएर विशेषज्ञ शल्यचिकित्सा सेवा उपलब्ध गराउन मेडिकल कलेज र प्रतिष्ठानहरूसँग सम्झौता गर्न सुरु गरेको हो ।

यसका लागि मन्त्रालयले ‘मेडिकल कलेज र स्वास्थ्य विज्ञान प्रतिष्ठानले विशेषज्ञ शल्यचिकित्सा सेवा उपलब्ध गराउने सम्बन्धी कार्यविधि २०७८ जारी गरेको छ । कार्यविधिमा प्रत्येक मेडिकल कलेज तथा प्रतिष्ठानले मन्त्रालयले तोकेको एक जिल्लामा जिम्मा लिएर शल्यचिकित्सा सेवा सुरु गर्नुपर्ने उल्लेख छ ।