चितवन / चितवनको भरतपुर विमानस्थलमा बुद्ध एयरको जहाज आपतकालीन अवतरण गरेको छ ।
काठमाडौँ उडेको बुद्ध एयरको ९ एन एईई बीचक्राफ्ट जहाजमा यान्त्रिक गडबडी आएपछि केही बेरमै पुनः भरतपुरमै अवतरण गरेको हो ।
दिउँसो १ः १६ बजे आकाशमा उड्ने बित्तिकै प्राविधिक समस्या देखिएको क्याप्टेनले जनाएपछि तत्काल भरतपुरमै अवतरण गरिएको नागरिक उड्डयन प्राधिकरण भरतपुरका सूचना अधिकारी दीपक विकले जानकारी दिए ।
जहाज अवतरणपछि सबै यात्रु सकुशल बाहिर निस्किएका छन् । अन्य कारणका बारेमा खोजी भइरहेको उनले जानकारी दिए । उक्त जहाजमा १८ यात्रु र चालक दलका सदस्य रहेका थिए ।
जिल्ला प्रहरी कार्यालय चितवनका प्रमुख प्रहरी उपरीक्षक ओमप्रकाश अधिकारीले यात्रु र चालक दल सबै सकुशल रहेको बताए ।
