काठमाडौँ
/ यातायात व्यवस्था विभागले एउटा प्रदेशबाट अर्को
प्रदेशमा जाने सवारी साधनमा भाडा बढाए पनि यातायात व्यवसायीले राजधानीमै सकेजति
असुल्न थालेका छन्।
विभागको
वेबसाइटमा गत असार ३१ गते अन्तर प्रदेशमा चल्ने सार्वजनिक सवारीमा भाडा बढाइएको
सूचना राखिएको छ । राजधानीमै व्यवसायीले मनपरी भाडा लिँदा विभागले अनुगमन नगरेको
यात्रुको गुनासो छ । यात्रु रामचन्द्र सिम्खडाले शुक्रबार गोकर्णेश्वरबाट
जोरपाटीसम्म तीन किमीभन्दा कम दूरी यात्रा गरेको भाडा २० रुपैयाँ असुलेको बताएका
छन्। बढी भाडा लिने बा२ख ६८०५ नंको बसका बारेमा प्रहरीलाई जानकारी गराए पनि
कारबाही नभएको उनको गुनासो छ ।
ट्राफिक
प्रहरीको नं १०३ मा फोन गरी तोकिएको भन्दा छ रुपैयाँ बढी भाडा लिएको जानकारी गराए
पनि कारवाही नभएको उनको दुःखेसो छ । फोन उठाएका ट्राफिक प्रहरी चन्द्र केसीले
कारवाही गराए पछि जानकारी गराउँछौँ भनेको यात्रु सिम्खडाले बताएका छन्। त्यो
सवारी पछि पनि सडकमा गुडेकाले कारवाही नभएको उनकोको ठम्याइ छ । साउन लागेसँगै भाडा
बढेको छ भनी ठगिनेमा सिम्खडा प्रतिनिधि पात्र मात्र छन् ।
यही
साउन १ गते शुक्रबार नै रत्नपार्कबाट गौशालासम्म सार्वजनिक यातायातमा यात्रा गर्दा
यात्रु रमा भट्टराईले तोकिएभन्दा छ रुपैयाँ बढी भाडा तिर्नुपर्यो । असार ३१
गतेदेखि भाडा बढेको छ। अब चढेपछि न्यूनतम २० रुपैयाँ भाडा भएको छ भन्दै बा५ख २७६४
नंको बसका परिचालकले भट्टराईसँग बढी भाडा असुलेका हुन् ।
छोटो
दूरीमा छ रुपैयाँ र लामो दूरीमा दोब्बरसम्म बढी भाडा असुली भइरहेको भएपनि अनुगमन
गर्नुपर्ने निकाय मौन छन् । विभागको वेबसाइटमा राखिएको ल्याण्डलाइन फोन सम्पर्क
गरेर जानकारी गराउन खोज्दा फोन नउठ्ने गरेको यात्रुको गुनासो छ । वेबसाइटमा
विभागका सूचना अधिकारी डा लोकनाथ भुसालको मोबाइल नम्बरसमेत राखिएको छ । भुसालको
९८५१२५३१३५ मोबाइल नंमा पटकपटक फोन गर्दासमेत उठ्दैन । महानिर्देशक नमराज घिमिरेको
मोबाइल नम्बरसमेत पत्ता लगाएर फोन गरे पनि नउठेको यात्रु बताउँछन् ।
पटकपटकको
मोबाइल सम्पर्कपछि फोन उठाउनुभएका सूचना अधिकारी भुसालले विभागले अन्तर प्रदेशमा
मात्र भाडा बढाउन पाउने व्यवस्था अनुसार एक प्रदेशबाट अर्को प्रदेशमा जाँदा बढी
लिन पाइने गरी बिहीबारदेखि भाडा बढाइएको बताएका छन् । प्रदेशभित्र र स्थानीय तहको क्षेत्रमा चल्ने
सवारीको भाडा बढाउने अधिकार प्रदेश र स्थानीय सरकारलाई नै दिइएको उनले जानकारी गराएका
छन् ।
विभागले
गत वैशाख १७ गते भाडा बढाउने सम्बन्धमा पठाएको फाइलको निर्णय अनुसार गत असार २७
गते भाडा बढाएको हो । सवा दुई महिनासम्म फाइल थन्क्याएर सरकार परिवर्तन हुने
बेलामा भाडा बढाइएको भन्दै पाँच विद्यार्थी सङ्गठनलगायत नागरिकस्तरबाट पनि यसको
विरोध भइरहेको छ ।
विभागको
अनुगमन सुस्त, ट्राफिक प्रहरी केही सक्रिय
यातायात
अनुगमनका लागि विभागबाट विशेष जिम्मेवारी पाएका नायबसुब्बा केशवराज जमरकट्टेल र
चार जना ट्राफिक प्रहरी अनुगमनमा खटिने गरेको सूचना अधिकारी भुसालले जानकारी दिएका
छन् । विभागले यातायात अनुगमनका लागि छुट्टै सवारीको व्यवस्था गरे पनि त्यसको
सदुपयोग नभएको यात्रुको गुनासो छ ।
महानगरीय
ट्राफिक प्रहरी महाशाखा रामशाहपथका प्रवक्ता सञ्जीव शर्मादासले शुक्रबार
तोकिएभन्दा बढी भाडा लिने १६० सवारीलाई कारवाही गरिएको जानकारी दिएका छन् । बढी
भाडा लिने सवारीलाई पहिलोपटक ५०० रुपैयाँ देखि एक हजार ५०० रुपैयाँ सम्म कारवाही
गरिएको महाशाखाले जनाएको छ । बढी भाडा लिने क्रम दोहोर्याउने सवारीलाई पाँच हजार रुपैयाँ
जरिवाना गरी सवारीको दर्ता खारेज गर्नेसम्मको तयारी भएको प्रवक्ता शर्मादासले जानकारी
दिएका छन् ।
“प्रत्येक दिन धुम्बाराही चोकबाट
रानीपोखरीसम्म म पनि सार्वजनिक यातायातमा यात्रा गर्छु, सार्वजनिक यातायातका समस्या राम्रोसँग
थाहा पाएकाले समस्या समाधानमा लागिपरेको छु”, उनि
भन्छन् । शनिबार पनि बिहानैदेखि बढी भाडा लिएको गुनासो आइरहेकाले कार्यालयबाट धेरै
जनशक्ति सार्वजनिक यातायात अनुगमनमै खटाइएको महाशाखाले जनाएको छ । यात्रुलाई
तोकिएभन्दा बढी भाडा नतिर्न र बढी भाडा लिनेको जानकारी महाशाखाको निःशुल्क फोन नं
१०३ मा खबर गर्न प्रवक्ता शर्मादासले आह्वान गरेका छन् ।
