काठमाडौं। नेपालले बंगलादेशमा थप २० मेगावाट बिजुली निर्यात गर्ने तयारी अन्तिम चरणमा पुगेकै बेला भारतले प्राविधिक कारण देखाउँदै अनुमति रोकेको छ। नेपाल र बंगलादेश सहमतिमा भए पनि भारतीय प्रसारण लाइनमै निर्भर रहँदा ऊर्जा व्यापार फेरि भारतको निर्णयमा अड्किएको छ।
नेपालको जलविद्युत् उत्पादन बढ्दै गएसँगै निर्यात बजार विस्तारको प्रयास पनि भइरहेको छ। हाल ४० मेगावाट बिजुली बंगलादेश निर्यात भइरहेको छ भने थप २० मेगावाट पठाउने सहमति भइसकेको थियो। तर भारतको केन्द्रीय विद्युत् प्राधिकरणले प्रसारण लाइनमा पर्याप्त क्षमता नभएको भन्दै अनुमति दिएको छैन।
नेपाल विद्युत् प्राधिकरणले भने आवश्यक निर्णय भए अहिलेको संरचनाबाटै थप विद्युत् निर्यात सम्भव रहेको बताएको छ। तर त्यसका लागि नेपाल, भारत र बंगलादेशबीच उच्चस्तरीय सहमति आवश्यक पर्ने जनाएको छ।
ऊर्जा मन्त्रालयले भारतसँग सचिवस्तरीय बैठकका लागि कूटनीतिक पहल जारी रहेको जनाएको छ। सोही बैठकले थप २० मेगावाट बिजुली निर्यातको बाटो खुल्ने वा नखुल्ने टुंगो लगाउने अपेक्षा गरिएको छ।
उत्पादन बढे पनि प्रसारण पहुँचमा परनिर्भरता कायम रहँदा नेपालको ऊर्जा निर्यात भारतको स्वीकृतिमै अड्किएको छ। अब सचिवस्तरीय बैठकको निर्णयले नेपाली बिजुली बंगलादेश पुग्ने–नपुग्ने तय गर्नेछ।
