काठमाडौं— नेकपा (माओवादी केन्द्र)का सांसद माधव सापकोटाले प्रधानमन्त्री संसद्प्रति गैरजिम्मेवार बनेको आरोप लगाएका छन् । आइतबार संसद् भवनबाहिर पत्रकारहरूसँग कुरा गर्दै उनले यस्तो आरोप लगाएका हुन् ।
उनले तीनकुनेमा भएको व्यवस्थाविरोधी घटनाका बारेमा प्रधानमन्त्रीले संसद्मार्फत सम्बोधन गरेर व्यवस्थाप्रति विश्वास आर्जन गर्नुपर्ने उल्लेख गरे । गणतन्त्रवादीहरूलाई एकताबद्ध गरी व्यवस्था सुदृढ बनाउनुपर्नेमा प्रधानमन्त्री अन्तै अल्मलिएको जिकिर गरे ।
प्रधानमन्त्रीले अराजकतालाई मलजल गरेको आरोप लगाए । व्यवस्थाविरोधी तीनकुने घटनामा मान्छेलाई थुनेर आगो लगाएर हत्या हुँदा समेत प्रधानमन्त्रीले कुनै सम्बोधन नगरेर लोकतान्त्रिक गणतन्त्र सुदृढ बनाउने अवसर गुमाएको उनको भनाइ छ ।
'आज प्रधानमन्त्रीले संसद्मा आएर सबै घटनाक्रमका बारेमा देशलाई अपिल गर्ने, गणतन्त्रवादीहरूलाई एकताबद्ध गराउने र यो व्यवस्थाका बारेमा विश्वास आर्जन गर्ने एउटा ठूलो अवसर थियो । यति ठूलो कुरा संसद्मा आएर नगरेर प्रधानमन्त्री कहाँ अल्मलिरहनुभएको छ? यसले के देखाउँछ भने यो व्यवस्थालाई रक्षा गर्नका निमित्त यो व्यवस्थालाई सुदृढ गर्नका निमित्त, विधि मूल्य मान्यतालाई सुदृढ गरेर अगाडि लैजानका लागि प्रधानमन्त्री जिम्मेवार हुनुहुन्न । र यो अराजकता र बेथितिलाई थप मलजल गर्ने काम गरी राख्नुभएको छ', उनले भने ।
सांसद सापकोटाले प्रधानमन्त्री र सत्तापक्ष असहिष्णु, गैरजिम्मेवार, घटनाक्रम र व्यवस्थाप्रति संवेदनशील नभएको आरोप लगाए । राजनीतिक परिस्थिति थप जटिल बन्दै गएको उनको भनाइ छ ।
