काठमाडौं— नेकपा (एकीकृत समाजवादी)ले १५ गते राजावादीहरूले प्रदर्शनका क्रममा आफ्नो पार्टी कार्यालय, कार्यालयमा रहेका भौतिक संरचनाहरूमा गरेको आगजनी, तोडफोड र लुटपाटविरुद्ध चैत २५ गतेभित्रै सबै प्रदेश, जिल्ला र स्थानीय कमिटीमा प्रदर्शन गर्ने भएको छ ।
शनिबार बसेको पार्टीको स्थायी कमिटी बैठकको निर्णय आइतबार पत्रकार सम्मेलनमा सार्वजनिक गर्दै पार्टीले राजावादी हर्कतबिरुद्ध भण्डाफोर अभियान चलाउने निर्णय गरेको प्रचार विभाग प्रमुख प्रकाश ज्वालाले जानकारी दिए ।
बैठकले पारित गरेको निर्णयमा समाजवादीले भनेको छ, ‘हाम्रो पार्टी कार्यालय काठमाडौं आलोकनगरस्थित केन्द्रीय कार्यालय र काठमाडौं जिल्ला कार्यालय तथा पार्टी अध्यक्ष माधवकुमार नेपालको निवास, औषधि उत्पादन गर्ने जडिबुटी कारखानमा आगजनीलगायतका विभिन्न स्थानमा भएको ढुंगामुडा, तोडफोड र आगजनीविरुद्ध यही चैत २५ गतेभित्र सबै प्रदेश, जिल्ला, स्थानीय कमिटी र जनसङ्गठनहरूले सम्बन्धित तहमा देशव्यापी विरोध प्रदर्शन गर्ने’,।
