इटहरी (सुनसरी) । कृषि अनुसन्धान निर्देशनालय तरहरा, बागवानी अनुसन्धान इकाईले आँपका बिरुवा जथाभावी नकिन्न किसानलाई आग्रह गरेको छ । इकाई प्रमुख महावीरलाल देवले किसानलाई आँपका बिरुवा हुर्कन र फल्नका लागि उपयुक्त माटो र मौसम आवश्यक हुने भएकाले अनुसन्धानबिना बिरुवा रोप्न नहुने बताए ।
विशेषगरी मधेस प्रदेश र कोशी प्रदेश आँपका लागि उपयुक्त मानिए पनि विभिन्न स्थानमा मौसम र माटोको भिन्नताले उत्पादनमा असर पार्ने भएकाले बिरुवा किन्दा त्यसको प्रजाति के हो भनेर ध्यान दिनुपर्ने उनको भनाइ छ । इकाई प्मुख देवले किसानलाई सस्तोमा आँपका बिरुवा पाउनेबित्तिकै किन्न लालायित नहुन र पछि पछुताउने अवस्थाबाट बच्न आग्रह गरे ।
‘बागवानीमा लामो समयदेखि आँपका बिरुवाको अनुसन्धान भइरहेको छ । कुन स्थानमा कस्तो प्रकारको बिरुवा रोप्ने निर्णय अनुसन्धानमार्फत मात्र थाहा हुन्छ । त्यसको आधारमा वातावरण र माटोको अवस्था अनुकूलका बिरुवा मात्र खरिद गर्नुपर्छ’, उनले सुझाव दिए ।
देवका अनुसार बागवानीले माल्दाह, अमरपालि, निलम र बार्हमासेजस्ता विभिन्न आँपका प्रजातीको अनुसन्धान गरिरहेको छ । बागवानीमा हाल पाँच सयभन्दा बढी आँपका बोट रहेको जानकारी दिँदै उनले आँपको उत्पादन र गुणस्तरमा सुधार ल्याउने उद्देश्यसहित प्रत्येक वर्ष किसानलाई बिरुवा वितरणको काम भइरहेको बताए ।
