बिरटनगर । झापा र पाँचथरबाट सोमबार प्रहरीले ४ जना फरार प्रतिवदीलाई पक्राउ गरेको छ । फैसला कार्यान्वयन अन्तरगत जिल्ला प्रहरी कार्यालय झापाबाट खटिएको प्रहरी टोलीले सम्मानित जिल्ला अदालत झापाको २०७९/११/१५ गतेको फैसला आदेशले लागुऔषध मुद्धामा २ महिना कैद र १२ हजार जरिवाना तोकिएका बिर्तामोड नगरपालिका-३ का २९ बर्षीय सोम बहादुर राईलाई पक्राउ गरेको हो ।
यसैगरी उच्च अदालत बिराटनगरको २०७८/११/२५ गतेको फैसला आदेशले बैकिङ कसुर मुद्धामा ६ लाख ४५ हजार ३ सय जरिवाना तोकिएका दमक-१ का खडानन्द भण्डारी र लागुऔषध मुद्धामा जिल्ला अदालत झापाको मिति २०८०/०१/१४ गतेको फैसला आदेशले १ बर्ष ३ महिना १९ दिन कैद तथा १५ हजार जरिवाना तोकिएका डमरु दासलाई सोमबार नै पक्राउ गरेको हो ।
यसैगरी जिल्ला प्रहरी कार्यालय पाँचथरबाट खटिएको प्रहरी टोलीले जबरजस्ती करणी मुद्धामा जिल्ला अदालत पाँचथरको सजाय निर्धारण फैसला आदेशले १ बर्ष कैद र २५ हजार जरिवाना तोकिएका हिलिहाङ गाउँपालिका-७ का ५६ बर्षीय नर बहादुर धमलालाई सोमवार नै पक्राउ गरेको हो ।
पक्राउ परेका चारै जनालाई सम्बन्धित जिल्ला अदालतमा उपस्थित गराईएकोमा अदालतले तोकिएको सजाय भुक्तानको लागी सम्बन्धित जिल्ला कारागारहरुमा पठाएको छ ।
