चितवन। मुग्लिन–नारायणगढ सडकखण्डको सेतीदोभान क्षेत्रमा ट्रक र मोटरसाइकल एकआपसमा ठोक्किँदा दुई जना गम्भीर घाइते भएका छन्। दुर्घटनापछि मोटरसाइकलमा आगलागी हुँदा सवारी पूर्णरूपमा जलेर नष्ट भएको प्रहरीले जनाएको छ।
प्रहरीका अनुसार दुर्घटनामा घाइते हुनेहरू लमजुङको राइनास गाउँपालिका–४ निवासी ५० वर्षीय बलराम पराजुली र गोरखाको सिराञ्चोक गाउँपालिका–१ निवासी २० वर्षीय प्रशान्त घिमिरे हुन्। उनीहरू दुवै मोटरसाइकलमा सवार थिए। गम्भीर घाइते भएका दुवै जनालाई उपचारका लागि नयाँ मेडिकल कलेज, भरतपुर पठाइएको छ।
प्रारम्भिक अनुसन्धानअनुसार नारायणगढबाट मुग्लिनतर्फ जाँदै गरेको ना ६ ख ४०९२ नम्बरको ट्रक र विपरीत दिशाबाट आउँदै गरेको मोटरसाइकल एकआपसमा ठोक्किएका थिए। ठक्कर लगत्तै मोटरसाइकलमा आगो लागेर पूर्णरूपमा नष्ट भएको छ भने ट्रकको अगाडिको भागमा समेत ठूलो क्षति पुगेको छ।
दुर्घटनामा संलग्न ट्रक चालक सिन्धुपाल्चोकको भोटेकोशी गाउँपालिका–१ निवासी ३२ वर्षीय राजु बिकलाई प्रहरीले नियन्त्रणमा लिएको छ। घटनाको कारण खुलाउन प्रहरीले थप अनुसन्धान अघि बढाएको जनाएको छ।
प्रहरीले वर्षायाममा सडक चिप्लो हुने र दृश्यता कम हुने भएकाले विशेष सावधानी अपनाएर मात्र यात्रा गर्न सबै सवारी चालकलाई आग्रह गरेको छ।
