बिर्तामोड / सौरमास अनुसार आज साउन महिनाको अन्तिम सोमबार भएकाले देशभरका शिवालयहरूमा श्रद्धालु भक्तजनको भीड लागेको छ
त्यस्तै पूर्वको पशुपतिनाथका नामले चिनिएको झापाको शनिश्चरेस्थित अर्जुनधारा जलेश्वर धाममा पनि बिहानैदेखि भक्तजनको भीड लागेको छ ।
साउन महिनाको सोमबार भगवान शिवको बार भएकाले यस दिन भगवान शिवको पुजा आराधना एवम् दर्शन गर्नाले मनोकामना पूरा हुन्छ भन्ने धार्मिक विश्वास भएका कारण पनि भगवान शिव प्रति आस्था र विश्वास राखेर मन्दिरमा जल चढाउन आउने भक्तजनको भीड लागेको हो ।
साउनको सोमबार शिवलाई शुद्ध जल चढाएर खुसी बनाउन सकिन्छ भन्ने शास्त्रीय मान्यता छ । जस कारण साउनको सोमबार व्रत बस्ने र शिवको आराधना गर्ने गरिन्छ । यस पटक साउनमा पाँचवटा सोमबार परेको थियो । यस वर्षको साउनको आज अन्तिम सोमबार हो ।
साउन महिनाको हरेक सोमबार व्रत बसेर शिवको पुजा गर्दै आएका महिलाहरूले आज विधिपूर्वक पूजाआजा गरी व्रत समाप्त गर्दछन् । अर्जुनधारा जलेश्वर धामको दर्शन गर्न देश तथा विदेश देखि समेत आउने गरेको धाम समितिले जनाएको छ ।
दर्शनका लागि बिहानै देखि हजारौँ भक्तजनहरू शनिश्चरे चोकदेखि लाममा बसेका छन् । भक्तजनका लागि सहज रुपमा लाम लागेर दर्शन गरी फर्कने व्यवस्था मिलाइएको छ ।
शनिश्चरे चोकदेखि नै खाली गोडा, पहेँलो एवं हरि वस्त्र पहिरिएका भक्तजन लाम लागेर आएको दृश्य देखिन्छ । उच्च स्वरमा बोल बम शब्द गुञ्जायमान गराउँदै भक्तजन अर्जुनधारा मन्दिरतिर आइरहेका छन् ।
