नेपालगञ्ज / १७ वर्षीया छात्रालाई बलात्कार गरेको आरोपमा प्रहरीले एक जनालाई पक्राउ गरेको छ । नेपालगञ्जको एउटा टेक्निकल कलेजका प्रधानाध्यापक ४१ वर्षीय हिक्मत रावललाई पक्राउ गरेको हो ।
रावलका विरुद्ध छात्राले बलात्कार गरेको भनेर उजुरी दिएपछि पक्राउ गर्नु परेको बाँकेका प्रहरी प्रमुख एसपी श्याम कृष्ण अधिकारीले बताए ।
एसपी अधिकारीका अनुसार पक्राउ परेका रावल स्टिङ बेलका अध्यक्ष समेत हुन् ।
उनले टेक्निकल कलेजमा अंग्रेजी विषय पढाउँदै आएका थिए ।
गत साउन २२ गते पहिलो पटक प्रलोभनमा पारेर शिक्षक रावलले बलात्कार गरेको र त्यसपछि उक्त भिडिओ आफूले सुरक्षित राखेको भन्दै त्यो सार्वजनिक गरिदिने डर, त्रास र धम्की दिँदै पटक पटक बलात्कार गरेको जाहेरीमा उल्लेख रहेको घर्तीले बताए ।
भिडिओ सार्वजनिक गरिदिने डर धम्की र त्रास दिएर पीडित छात्रालाई ती शिक्षकले भारतको लखनउसम्म लगेर यौन शोषण गरेको जाहेरीमा उल्लेख छ ।
छात्राका बुबाले आफ्नी छोरीको खोजी गरिदिन आग्रहका साथ प्रहरीमा जाहेरी दिएपछि घटनाबारे प्रहरीले जानकारी पाएको प्रहरी निरीक्षक घर्तीले बताए ।
‘बुबाको जाहेरीपछि प्रहरीले घटना अनुसन्धान थालेको थियो,’ घर्तीले भने, ‘पीडित छात्राको जाहेरीपछि तत्काल हामीले शिक्षक रावललाई पक्राउ गरेका हौं ।’
घटनाबारे थप अनुसन्धान जारी रहेको प्रहरीले जनाएको छ ।
