काठमाडौँ / युवा
विद्यार्थीको नोबेल पुरस्कारका रूपमा चिनिएको हल्ट प्राइजको अन्तिम प्रतिस्पर्धामा
भाग लिन नेपाली युवा वैज्ञानिकहरू लण्डन जाने भएका छन् ।
दश लाख अमेरिकी डलर
रकमको उक्त पुरस्कारका लागि वैशाखमा पहिलो र दोस्रो चरणको छनोट प्रतियोगिता भएको
थियो । डल्ले च्याउ बनाउने मेसिन बनाएर प्रतिस्पर्धामा सहभागी भएका युवा
वैज्ञानिकहरू शिशिर पन्त, प्रशान्त भट्ट,
निर्देश भट्टराई र सोनी पोख्रेलको टोली अगस्ट ८ देखि सेप्टेम्बर १२
सम्म लण्डनमा हुन लागेको कार्यक्रमका लागि जाने तयारि गरेको छ ।
विश्वभरिबाट अन्तिम
चरणका लागि पुगेका ६९ जना सहभागी हुने उक्त कार्यक्रममा नेपाली युवा वैज्ञानिक पनि
सहभागी हुन लागेको शिरिर पन्तले जानकारी दिएका छन् ।
लण्डनमा सहभागी हुन
आउन खर्च लाग्ने दुखेसो गरेपछि गैरआवसीय नेपाली सङ्घका पदाधिकारीले व्यक्तिगत रूपमा
र संस्थागत रूपमा सहयोग गर्न पहलका लागि गो फण्ड परोपकारी सञ्जाल मार्फत रकम
सङ्कलनको अभियान चलाइएको एक सामाजिक अभियानकर्मीले जानकारी दिएका छन् ।
बस्न र खानका लागि
बेलायतमा रहेका नेपाली व्यवसायीले सहयोग गर्ने बताए पनि आउने जाने खर्चकालागि
रकमको समस्या रहेको हुँदा उक्त सहयोग अभियान सञ्चालन गरिएको हो । घरेलु
उद्योगका रूपमा विकास गर्न पनि सकिने र गृहिणीले आफ्नो बचेको समयमा यसैमा समय
बिताए पैसा र पौष्टिक आहार दुवै हुने सोचका साथ विकास गरिएको मेसिनले कम खर्चमा
डल्ले च्याउ उत्पादन गर्ने बताइएको छ ।
हाल व्यावसायिकरूपमा
च्याउखेती गरिँदै आए पनि बढी खर्चिलो भएको हुँदा यो प्रविधिले थोरै रकमबाट पनि
आर्थिक आयआर्जन गर्न सकिने र विदेशबाट आयात गरिने च्याउको मात्रामा समेत कमी आउने
युवा वैज्ञानिकहरुको भनाइ छ ।
