विराटनगर / विराटनगर – ३ कंन्चनबारीस्थित आर्या न्युरो हस्पिटलमा एक जनाविरामीको फिस्टुलाको कारण भएको जटिल प्रकृतिका ‘ब्रेन हेमरेजको’ सफल शल्यक्रिया भएको छ ।
मोरङको सुन्दरहरैचा नगरपालिका– १० बेलेपुर घर भएका ४८ वर्षीय विनोदकुमार साहको ब्रेन हेमरेजको सफल शल्यक्रिया भएको हो । अस्पतालका वरिष्ठ न्यूरो सर्जन तथा प्रबन्धक निर्देशक डा . पंकजराज नेपालले साहको ब्रेन हेमरेजको सफल शल्यक्रिया गरेका छन् । १७ दिन अगाडि अर्थात २६ साउनमा टाउको दुखेपछि साह बेहोस भएका थिए । ‘१० मिनेट जति बेहोस भएपछि रगत नै बमिट पनि गर्नुभयो । हामीले आतिएर विराटनगरको विराट टिचिङ्ग हस्पिटलमा लिएर गयौं । त्यहाँ २४ घण्टा आइसियूमा विरामी राख्नु पर्ने बताएपछि हामीले त्यहाँबाट आर्या न्युरो हस्पिटलमा लिएर आएका थियौं,’ श्रीमती सुनिताले भनिन्, ‘आर्या न्यूरोमा ल्याएपछि वरिष्ठ न्यूरो सर्जन डा. पंकजराज नेपालले बिरामी हेरेपछि अप्रेसन गर्नुपर्ने सुझाव दिनुभयो । हामीले मन्जुरी दिएपछि अप्रेसन सफल पनि भयो ।’
डा नेपालको टिमले पाँच घण्टा लगाएर साहको सफल शल्यक्रिया गरेको अस्पतालले जनाएको छ । ‘साहको ठाउँकोमा रगतको नशा गुजुल्टिएर बसेको थियो । त्यसलाई मेडिकल भाषामा एभी फिस्टुला अर्थात बुझ्ने भाषामा रगतको नशा गुजुल्टीएको भन्न सकिन्छ । त्यो रगतको नली फुटेपछि ब्रेन हेमरेजहुने हो,’ न्युरो सर्जन डा. नेपालले भने, ‘पाँच घण्टा लगाएर बिरामीको शल्यक्रिया गरेपछि हामीले करिब एक सेन्टिमिटर लामो गुजुल्टीएको नशा शल्य क्रियागरि निकालेका थियौं ।’
‘यस्ता बिरामी विरलै हस्पिटल आउने गरेका छन्,’ डा। नेपालले भने, ‘ब्रेन हेमरेज जन्मजात पनि र इन्फेक्सनका कारणहरूले पनि हुने गर्दछन् । यस्तो बिरामी जतिसक्दो चाँडै हस्पिटल आएको खण्डमा बिरामीलाई बचाउन सकिन्छ ।’
उपचार सम्भव नभएको भन्दै अन्य अस्पतालले हात उठाईसकेको अवस्थामा आर्याले उनीहरुलाई नयाँ जीवन प्रदान गर्न थालेको हो ।
यसरी एक पछि अर्को जटिल प्रकृतिका बिरामीको सफल उपचार गरि पूर्वाञ्चलमै कम खर्चमा गुणस्तरीय उपचार हुने भरपर्दो अस्पतालको रुपमा स्थापित हुदै आएको देखिन्छ ।
