बिर्तामोड / पछिल्लो समयमा प्रदेश १ का केही जिल्लामा शसस्त्र विद्रोहका नाममा हिंसात्मक गतिविधि गरिरहेको हिमाल सुरक्षा परिषद नामको सङ्गठनका मुख्य नाइके झापाका खगेन्द्र खरेल पक्राउ परेका छन् ।
जिल्ला प्रहरी कार्यालय झापाबाट सादा पोशाकमा खटिएका प्रहरीले खरेललाई भारतको नकलबन्दा क्षेत्रबाट भारतीय प्रहरीको सहयोगमा पक्राउ गरी बिहीबार बेलुका नेपाल ल्याएको प्रदेश प्रहरी कार्यालय स्रोतले जानकारी गराएको छ ।
पक्राउ परेका खरेललाई इटहरी बम विस्फोटनका विषयमा अनुसन्धान गरिरहेको जिल्ला प्रहरी कार्यालय सुनसरीको जिम्मा लगाएको बताइएपनि सो विषयमा दुवै जिल्ला प्रहरी कार्यालयले भने आधिकारिक रुपमा केही पनि बताएका छैनन् ।
विगत एक महिना यता प्रदेश १ का झापा र सुनसरीमा भएका बम आतंक र बम विस्फोटनका घटनाका नाइके मानिएका उनलाई ईटहरी घटनापछि पक्राउ परेकी एक महिलाको बयानका आधारमा उनको मोबाइलको सहायतामा नकलबन्दा क्षेत्रमा बोलाएर पक्राउ गरिएको स्रोतले बताएको छ ।
भारतमा गएर पक्राउ गर्न र भारतमा पक्राउ परेकालाई नेपालमा ल्याउन सुर्पुदगी सन्धि नभएका कारण प्रहरीले खरेल पक्राउको विषयलाई अनुसन्धान बाँकी रहेको जनाउँदै सार्वजनिक भने गरेको छैन । इटहरी बम बिस्फोटनमा परी घाईते भएका रविन थापा र शेरजन गुरुङको बयानका आधारमा अनुसन्धान गरिरहेको प्रहरीले इटहरी क्षेत्रबाट नै थप एक महिलालाई पक्राउ गरेको थियो ।
पक्राउ परेकी महिलाको नाम गोप्य राखेर अनुसन्धान गरिरहेको प्रहरीले उनकै मोबाइलको सहायतामा भारतको आसाम क्षेत्रमा रहेका खरेललाई नकलबन्दा बोलाएर नियन्त्रणमा लिएको प्रहरी स्रोतले बताएको छ ।
झापाको बिर्तामोड र दमक क्षेत्रमा बम आतंक मच्चाएको घटनापछि अनुसन्धान थालेको जिल्ला प्रहरी कार्यालय र प्रदेश प्रहरी कार्यालयको टोलीले केहि समय अघि ९ जनालाई पक्राउ गरेको थियो ।
पक्राउ पर्नेमा झापाको गौरादह २ का सुमन कुमार कार्की , कन्काई नगरपालिकाका भिष्म थापा , दमक ९ का देवी बास्कोटा गुरागाई , कन्काई ३ का कुमार भनिने यामदत्त सिटौला , शिवसतासी १ का सरुण लिम्बु भनिने दिल कुमार सामेखाम , संखुसभाको खाँदबारी १० का मनमोहन दाहाल , गौरीगंज नगरपालिका ३ का आनन्द भनिने अनन्त प्रसाई गिरी , गौरादह ५ का प्रदीप थापा र गौरीगंज ३ का बिजय कुमार दास हलुवाई रहेका थिए ।
उनीहरु पक्राउ पछि पनि अनुसन्धान जारी राखेको समयमा नै सुनसरीको इटहरीमा चर्चमा पड्काउनका लागि बोकेको बम पड्कँदा हिमाल सुरक्षा परिषद आवद्ध मानिएका दुई युवा आफै घाईते भएका थिए ।
खरेल र पक्राउ परेकी महिलाको विषयमा केही पनि सार्वजनिक नगरेको प्रहरीले थप अनुसन्धान भइरहेकाले सो विषयमा केही पनि बताउन नसक्ने जनाएको छ । जिल्ला प्रहरी कार्यालय सुनसरीका प्रमुख एवं प्रहरी उपरीक्षक सञ्जयसिंह थापाले पक्राउको विषयमा केहि पनि बताउन चाहेनन् । उनले सो विषयमा अनुसन्धान जारी रहेको जनाउँदै अनुसन्धान पूरा भएपछि पूर्ण विवरण सार्वजनिक गरिने जनाएका छन् ।
