काठमाडौं । पृथ्वीराजमार्ग अवरुद्ध भएपछि काठमाडौंमा पेट्रोलियम पदार्थको आपूर्ति प्रभावित हुने आशंका बढिरहेका बेला नेपाल आयल निगमले वैकल्पिक मार्गबाट इन्धन आपूर्ति सुरु गरिएकाले तत्काल अभाव नहुने जनाएको छ ।
धादिङको बेनीघाट रोराङ गाउँपालिकास्थित कृष्णभिर नजिकै त्रिशूली नदीले सडक कटान गरेपछि मुग्लिन–काठमाडौं सडकखण्ड पूर्ण रूपमा अवरुद्ध भएको छ । मुख्य राजमार्ग अवरुद्ध भएपछि राजधानीमा पेट्रोल, डिजेल तथा खाना पकाउने ग्यासको आपूर्ति प्रभावित हुनसक्ने चिन्ता बढेको थियो ।
तर, निगमले आपूर्ति प्रणालीलाई वैकल्पिक बाटोमा मोडेको छ । अमलेखगञ्जबाट हेटौंडा हुँदै साना क्षमताका ट्यांकरमार्फत काठमाडौंमा इन्धन ल्याउन थालिएको निगमका कार्यकारी निर्देशक नागेन्द्र साहले जानकारी दिएका छन् ।
उनका अनुसार अमलेखगञ्जमा पाइपलाइनमार्फत पर्याप्त इन्धन आइरहेको छ । त्यहाँबाट निजी ढुवानीकर्ता तथा डिलरका २० र १२ किलो लिटर क्षमताका ट्यांकर प्रयोग गरेर हेटौंडा हुँदै काठमाडौंसम्म इन्धन पुर्याइनेछ ।
सडक अवरुद्ध भएकाले इन्धन ढुवानीमा केही ढिलाइ हुनसक्ने भए पनि आपूर्ति नै रोकिने अवस्था नरहेको निगमको भनाइ छ । सडकको अवस्थाका कारण आपूर्ति शृंखलामा एक–दुई घण्टासम्म तलमाथि हुनसक्ने भए पनि बजारमा इन्धनको अभाव हुन नदिने गरी व्यवस्था मिलाइएको छ ।
एलपी ग्यासको आपूर्तिका लागि पनि हेटौंडा हुँदै वैकल्पिक रुट प्रयोग गरिने भएको छ । अधिकांश ग्यास उद्योग तराई क्षेत्रमा रहेकाले त्यहाँबाट ग्यास लोड गरी हेटौंडाको बाटो हुँदै काठमाडौं ल्याउने तयारी गरिएको छ ।
यसअघि लगातारको वर्षाका कारण रोकिएका अधिकांश इन्धन ट्यांकर शनिबार नै काठमाडौं प्रवेश गरिसकेका छन् । त्यसैले तत्काल पेट्रोल, डिजेल तथा ग्यासको अभाव हुने अवस्था नरहेको निगमले जनाएको छ ।
यसले मुख्य राजमार्ग अवरुद्ध हुँदा पनि वैकल्पिक रुट र पाइपलाइनमा आधारित आपूर्ति प्रणालीमार्फत काठमाडौंको इन्धन बजारलाई चलायमान राख्ने प्रयास गरिएको देखाएको छ ।
