काठमाडौं। नेपाली कांग्रेसका सभापति गगन थापाले प्रदेश सरकारमा सबै प्रमुख दललाई समेटेर सरकार बनाउने प्रस्तावप्रति कडा असहमति जनाएका छन्। उनका अनुसार यस्तो अभ्यासले जनताले दिएको मतादेशको मर्मलाई कमजोर पार्ने मात्र होइन, प्रदेश सभालाई प्रतिपक्षविहीन बनाउने जोखिम पनि बढाउँछ।
ललितपुरमा आयोजित कार्यक्रममा बोल्दै थापाले सत्ता साझेदारीको नाममा सबै दल सरकारमै बस्ने प्रवृत्ति लोकतन्त्रका लागि उपयुक्त नहुने बताए। उनले कांग्रेसले सरकारमा बस्ने अवसरभन्दा लोकतान्त्रिक मूल्य र सिद्धान्तलाई प्राथमिकता दिने दाबी गरे।
थापाले विगतका राजनीतिक अभ्यासतर्फ संकेत गर्दै सत्ता केन्द्रित राजनीतिले दलहरूको विश्वसनीयता कमजोर बनाएको टिप्पणी गरे। चुनावमा एक दलसँग गठबन्धन गर्ने र सरकारमा अर्को दलसँग मिल्ने प्रवृत्तिले राजनीतिक अस्थिरता बढाएको उनको भनाइ थियो।
उनले विशेषगरी बागमती प्रदेशको सन्दर्भ उठाउँदै कांग्रेसले सिद्धान्तमा सम्झौता नगर्ने बताए। प्रदेश सरकारको समीकरणबारे अनेक चर्चा भइरहेका बेला थापाको यो अभिव्यक्तिलाई कांग्रेसको भावी रणनीतिको संकेतका रूपमा पनि हेरिएको छ।
यता कांग्रेसले कर्णाली प्रदेश सरकारबाट आफ्ना मन्त्री फिर्ता बोलाइसकेको छ भने मुख्यमन्त्रीविरुद्ध अविश्वास प्रस्तावसमेत दर्ता गरिसकेको छ। एमालेसँगको पुरानो समझदारीलाई निरन्तरता नदिने पक्षमा कांग्रेसभित्र मत बलियो बन्दै गएको अवस्थामा प्रदेश सरकारहरूको नयाँ समीकरणबारे राजनीतिक बहस अझ तीव्र हुने देखिएको छ।
