गण्डकी । पोखरा महानगर क्षेत्रको फोहरपानी व्यवस्थापनसम्बन्धी गुरूयोजना तयार गरिएको छ ।
पोखरा महानगरपालिकाले जापान अन्तर्राष्ट्रिय सहयोग नियोग (जाइका), याचियो इञ्जिनियरिङ कम्पनी लिमिटेड, निहोन सुइडो कम्पनी लिमिटेड र एनजेएस कम्पनी लिमिटेड जापानको प्राविधिक सहयोगमा उक्त गुरूयोजना तयार गरेको हो ।
महानगरपालिकाका चार वटा क्षेत्रहरूमा प्रशोधन केन्द्रहरू नै निर्माण गरी फोहर पानी प्रशोधनमार्फत पुनः प्रयोगका लागि योग्य बनाएर नदी तथा तालहरूमा छोडिने गुरूयोजनामा उल्लेख गरिएको छ ।
महानगरको पश्चिम क्षेत्र, मुख्य सहरी भाग, हेमजा क्षेत्र र पूर्वी भागमा फोहरपानी प्रशोधन केन्द्रहरू स्थापना गरिनेछन् । यी केन्द्रमार्फत प्रतिदिन एक लाख ३४ हजार घनमिटर पानी प्रशोधन हुने महानगरपालिकाले जनाएको छ ।
गुरूयोजनाअनुसार पानी प्रशोधन क्षेत्रका लागि पाइपलाइन योजना विकास र सबै प्रणालीहरूमा छुट्टाछुट्टै ढलहरू प्रयोग हुने महानगरपालिका प्रमुख धनराज आचार्यले जानकारी दिए ।
त्यस्तै दुर्गम भूभागमा पानी सङ्कलनका लागि विभिन्न स्थानमा ‘पम्प स्टेसन’ र ‘म्यानहोल पम्प’ जडान गर्ने योजना रहेको उनले बताए । प्रमुख आचार्यले रू ११ अर्ब लागतको यो परियोजनाअनुसार फोहरपानीको प्रशोधन केन्द्र सञ्चालन गर्दा वातावरणीय स्वच्छता प्रवद्र्धनमा सहयोग पुग्ने विश्वास व्यक्त गरे ।
‘अब हामीले आकाशबाट पर्ने पानी, भान्साबाट निस्कने पानी, शौचालयबाट निस्कने पानीलगायत ढलमा मिसाइएका कुनै पनि चिजलाई यतिकै छोड्न मिल्दैन’, उनले भने, ‘यसले वातावरण प्रदूषण भइरहेको छ, भन्ने विश्वव्यापी रूपमा नै चिन्तन भइरहेका बेला पोखराका विभिन्न चार स्थानमा पोइन्टहरू निर्धारण गरी जाइकाले यसमा सहयोग गर्ने भएको हो ।
जानेर वा नजानेर हाम्रा ढलहरू सीधै खोलामा मिसिने गरेको बताउँदै उनले यो योजनाअनुसार फोहर पानी प्रशोधन गरेर मात्र खोलामा मिसाइने जानकारी दिए । दिगो विकासको लक्ष्यअनुसार सन् २०३० सम्म सबै सहरमा व्यवस्थित ढल निकासको व्यवस्थापन गर्नुपर्ने उल्लेख गर्दै महानगर प्रमुख आचार्यले यसको लक्ष्य भेट्नलाई पनि यो परियोजना पोखराका लागि महत्त्वपूर्ण हुने बताए ।
