काठमाडौं— नेपाल प्रिमियर लिगको आजका खेलमा सुदूरपश्चिम रोयल्स र कर्णाली याक्सले जित हात पारेका छन् । सुदूरपश्चिमले लुम्बिनी लायन्सलाई ४५ रनले हरायो भने कर्णालीले विराटनगर किंसलाई ७ रनले हराएको छ ।
प्रतियोगिता अन्तर्गत आजको पहिलो खेलमा सुदूरपश्चिम रोयल्सले लगातार तेस्रो जित दर्ता गरेको छ। लुम्बिनी लायन्सलाई ४५ रनले हराउँदै सुदूरपश्चिमले तेस्रो जित निकालेको हो।
सुदूरपश्चिमले पहिलो खेलमा विराटनगर किंग्सलाई ९० रनले र दोस्रो खेलमा काठमाडौं गुर्खाजलाई ७३ रनले हराएको थियो।
सुदूरले दिएको १८८ रनको लक्ष्य पछ्याएको लुम्बिनीको लागि विवेक यादवले सर्वाधिक ७७ रन बनाए। उनले ५४ बलमा ३ चौका र ७ छक्का प्रहार गर्दै अविजित रहे। उनी एनपीएलमा अर्धशतक प्रहार गर्ने १२ औं खेलाडी बने। अन्तिम ब्याटर दुर्गेश गुप्ता शुन्यमा अविजित रहे।
लुम्बिनीका शीर्ष क्रमका ५ ब्याटर चल्न नसक्दा लुम्बिनीले २० ओभरमा १४२ रन बनाएको हो। लुम्बिनी लायन्सले पहिलो पावर प्लेमै शीर्ष क्रममा पाँच ब्याटरलाई गुमाएको थियो।
१८८ रनको लक्ष्य पछ्याएको लुम्बिनीले ६ ओभरको खेल सकिँदासम्म शीर्ष क्रममा पाँच ब्याटरलाई गुमाइ ३६ रन बनाएको थियो।
लुम्बिनीका ओपनर अर्जुन साउद ‘गोल्डेन डक’ भए। अर्का ओपनर उन्मुक्त चन्द पनि चार रनमै पभेलियन फर्किए। यसअघि पोखरा एभेन्जर्सविरुद्ध ९५ रन बनाएका कप्तान रोहितकुमार पौडेलले पनि आज पाँच रनमात्रै थप्न सके। टम मुरेसले सात रन जोडे। साद बिन जफर पनि ‘गोल्डेन डक’ भए। लुम्बिनीबाट क्रिजमा रहेका सन्दीप जोरा १० र विवेक यादवले ३७ रनको साझेदारी गर्ने कोशिस गरे।
सन्दीप जोराले २६ बलमा १ छक्का सहित २० रन बनाए। दिनेश अधिकारीले १६ बलमा २ चौकासहित १४ रन बनाए। सुदूरपश्चिमका ब्रान्डन म्याकमुलेन र सैब जैबले समान ३-३ विकेट लिए। स्टक कुग्गेलेनले २ र अभिनास बोहोराले १ विकेट लिए।
त्यसअघि, कीर्तिपुरस्थित त्रिवि क्रिकेट मैदानमा टस हारेर ब्याटिङमा आएको सुदूरपश्चिमले निर्धारित २० ओभरमा ४ विकेट गुमाएर १८७ रनको योगफल खडा गरेको थियो।
सुदूरपश्चिमबाट जैबले सर्वाधिक ९० रन बनाए। उनले ६१ बलमा ६ चौका र ५ छक्का प्रहार गर्दै ९० रन बनाए। उनलाई रेमन सिमोन्डले उन्मुक्त चन्दको हातबाट क्याच आउट गराए।
जैबले अर्का ओपनर विनोद भण्डारीसँग ४९ रनको साझेदारी गर्दै सुदूरपश्चिमलाई बलियो सुरुआत दिलाएका थिए। यस्तै, उनले दोस्रो विकेटका निम्ति ब्रान्डन म्याकमुलमसँग ५६ रनको साझेदारी गरेका थिए। विनोदले सुदूरपश्चिमको खातामा १७ रन थपे। रोहितुकमार पौडेलले गरेको सातौँ ओभरको तेस्रो बलमा सन्दीप जोराबाट क्याच हुनुअघि उनले १३ बलमा दुई चौका प्रहार गरे। ब्रान्डन म्याकमुलमले २० बलमा एक छक्का र एक चौकासहित २३ रन बनाए। म्याकमुलमलाई १३.४ ओभरमा विवेक यादवले साद बिन जफरबाट क्याच गराएका थिए।
तेस्रो विकेटका रुपमा सैब जैबको विकेट पतन भयो। चौथो विकेट पाँचौं ब्याटरका रुपमा मैदानमा आएका आरिफ शेख गोल्डेन डक भए।
सुदूरका लागि दिपेन्द्र सिंह ऐरी ३९ रनमा अविजीत रहे। भने अर्का ब्याटर स्कट कुग्गेलिन ११ रनमा अविजीत रहे। लुम्बिनीका लागि रेमोन सिमोन्डले २ विकेट लिए भने रोहित पौडेल र विवेक यादवले १-१ विकेट लिए।
एनपीएलमा दुई खेल खेलेको लुम्बिनीले दुवै खेलमा हार व्यहोरेको छ। लुम्बिनी आफ्नो पहिलो खेलमा विराटनगर किंग्ससँग दुई विकेटले पराजीत भएको थियो। दोस्रो खेलमा पोखरा एभेन्जर्ससँग पराजीत भएको थियो।
सुदूरपश्चिमको लगातार तेस्रो जितपछि मुख्य प्रशिक्षक जगत टमाटाले कन्फिडेन्सका साथ खेलाडी मैदानमा उत्रिएपछि पदर्शन राम्रो हुने भन्दै अहिले सुदूरपश्चिमका खेलाडीको कन्फिडेन्स र प्रदर्शदन दुवै राम्रो भएको बताए ।
तेस्रो हारपछि लुम्बिनी लायन्सका मुख्य प्रशिक्षक नन्दन फाडनिसले आपसी केही तालमेल नमिल्दा नतिजा आफ्नो पक्षमा नआएको बताएका छन् ।
प्रतियोगिता अन्तर्गत आजको दोस्रो खेलमा कर्णाली याक्सले दोस्रो जित हासिल गरेको छ। कर्णालीले विराटनगर किङ्सलाई ७ रनले पराजित गरेको हो। कर्णालीले जनकपुरसँग ८ विकेट र काठमाडौंसँग ३ विकेटको हार बेहोरेको कर्णालीले चितवनमाथि ६ विकेटको जित हाँसिल गरेको थियो।
कीर्तिपुरस्थित त्रिवि क्रिकेट मैदानमा टस हारेर ब्याटिङको निम्तो पाएको कर्णालीले निर्धारित २० ओभरमा १३३ रन बनाउँदै अलआउट भएको थियो। कर्णालीले दिएको १३४ रनको लक्ष्य पछ्याएको विराटनगर किंग्सले निर्धारित २० ओभरमा ८ विकेट गुमाउँदै १२६ रन बनाएको हो।
अन्तिम ओभरमा १५ रन चाँहिदा नन्दन यादवले जम्मा ७ रन दिँदै कर्णालीले अन्तिम समयमा जित निकालेको हो। विराटनगरका लागि कप्तान सन्दीप लामिछाने ६ र प्रतिश जिसी ७ रनमा अविजित रहे। विराटनगरका लागि निकोलस क्रिटोनले सर्वाधिक ४० रन बनाए। उनले ३९ बलमा ४ चौका र १ छक्का प्रहार गरे।
विराटनगरले पावरप्लेमा विराटनगरले ३ विकेट गुमाउँदै ३६ रन बनाएको थियो। ओपनरद्वय लोकेश बम १९ र मार्टिन गप्टिल ४ रनमा आउट भए। अकिब इलियास ८ रनमा पेभेलियन फर्किए। विराटनगरले १० ओभरमा ४ विकेट गुमाउँदै ५३ रन बनाएको थियो।
पाँचौं विकेटको रुपमा वसिर अहमदको विकेट गयो। उनलाई ८ रनमा नै युनिस विक्रम ठकुरीले कट एण्ड बोल्ड गरे।
छैटौं विकेट विराटनगरले दिपक बोहोराको विकेट गयो। उनले निकोलस क्रिटोनसँग छैटौं विकेटका लागि ४४ रनको साझेदारी गरे।
सातौं विकेट निकोलस क्रिटोनको गयो। उनलाई नन्दन यादवले १७.४ ओभरमा बोल्ड आउट गरे।
कर्णालीका लागि नन्दन यादवले सर्वाधिक ३ विकेट लिए। विपिन शर्माले २ र विलियम बोसिस्टो युनिस विक्रम ठकुरी र सोमपाल कामीले समान १/१ विकेट लिए।
त्यसअघि, कर्णालीको लागि विलियम बोसिस्टोले सर्वाधिक ६६ रनको पारी खेले। उनले ४९ बलमा ५ चौका र ३ छक्का प्रहार गरेका हुन्।
त्यस्तै, ओपनर देव खनालले ४८ बलमा ४ चौका र २ छक्का प्रहार गर्दै क्याच आउट भए। ओपनर शिखर धवन ५, चाड्विक वाल्टन १, जिसन मक्सुद २ रन बनाए भने ४ खेलाडी डकआउट भए। अन्तिम ओभरमा ४ विकेट गुमायो। अन्तिम ओभरको ३ बलमा ३ विकेट जाँदा कर्णाली अलआउट भएको हो।
विराटनगरका लागि प्रतिश जिसीले सर्वाधिक ४ विकेट लिए। क्रिस सोल, वसिर अहमदले समान २/२ विकेट लिए। अकिव इलियासले १ विकेट लिए।
विराटनगरले पहिलो खेलमा जनकपुरसँग ८ विकेट, सुदूरपश्चिमसँग ९० रनले हार बेहोरेको थियो भने लुम्बिनी लायन्समाथि २ विकेटको जित निकालेको थियो।
जितपछि खुसी व्यक्त गर्दै कर्णालीका कप्तान सोमपाल कामीले खेलमा जीत निकाल्नु आफ्नो जिम्मेवारी नै रहेको बताउँदै खेलाडीको कन्फिडेन्स र प्रदर्शन राम्रो रहेको बताए । उनले आगामी खेलमा पनि आफ्नो टीमको प्रदर्शन थप मजबुद बनाउने प्रतिबद्धता व्यक्त गरेका छन् ।
३ खेलमा ३ जीत निकालेको सुदूरपश्चिम हाल अंक तालिकाको शीर्ष स्थानमा उक्लिएको छ । ३ खेलमा ६ अंक जोडेको जनकपुर दोस्रो स्थानमा छ । ३ खेलमा २ जीत निकालेको चितवन ४ अंकसहित तेस्रो स्थानमा छ ।
प्रतियोगिता अन्तर्गत भोलि आइतबार हुने पहिलो खेल लुम्बिनी लायन्स र जनकपुर बोल्ट्सबीच तथा दोस्रो खेल सुदूरपश्चिम रोयल्स् र चितवन राइनोजबीच हुनेछ।
