काठमाडौं–नेपाल कम्युनिष्ट पार्टी (माओवादी केन्द्र) का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ ले पार्टीको अभियान घरदैलोमा केन्द्रित रहेको बताएका छन् । नेकपा (माओवादी केन्द्र) मध्यपुरथिमि नगर कमिटीले नेपाल सम्वत् १४४५ नयाँ वर्षको अवसरमा आयोजना गरेको शुभकामना आदानप्रदान कार्यक्रममा अध्यक्ष दाहालले आफ्नो नेतृत्वमा जनताको पक्षमा भएका कार्यहरूबारे जानकारी दिन अभियानमा जाने बताएका हुन् ।
दाहालले जनताको हितमा आफ्नो सरकारले धेरै काम गरेको र यसको जानकारी जनतासम्म पुर्याउनु आवश्यक रहेको बताए । उनले २०८४ सालको निर्वाचनमा माओवादी केन्द्रले बहुमतका साथ जित्ने दावा पनि गरेका छन् । कार्यक्रमअघि अध्यक्ष दाहालले शङ्खधर चोक, नयाँ थिमिमा रहेको शङ्खधर साख्वाको प्रतिमामा माल्यार्पण गरे।
