खलङ्गा / जुम्लामा १८ वर्षमाथिका नागरिकलाई कोरोनाविरुद्धको खोप आज (शनिबार) देखि लगाउन शुरु गरिएको छ ।
१८ वर्ष माथिका ४१ हजार ६७६ जनालाई खोप लगाउने लक्ष्य रहेको जिल्ला जनस्वास्थ्य सेवा कार्यालयका प्रमुख कृष्ण सापकोटाले जानकारी दिए ।
सापकोटाका अनुसार जिल्लाको कुल जनसङ्ख्याको ३३ प्रतिशतलाई खोप लगाउने सरकारी निर्देशनअनुसार खोप दिन लागिएको हो ।
सापकोटाले यसका लागि स्वास्थ्यकर्मी, स्वयंसेविका, शिक्षक र युवालाई परिचालन गरिएको र आठवटै स्थानीय तहमा दुई चरणमा खोप लगाउनका लागि तालिमप्राप्त स्वास्थ्यकर्मीसहित जिल्लाभर ५४७ स्वयंसेविका परिचालन गरिएको जानकारी दिए ।
जिल्लाभरका ३० स्वास्थ्य चौकी, ३२ खोप केन्द्र र कर्णाली प्रतिष्ठानबाट खोप दिन हाल ४१ हजार ७ सय ४० डोज खोप आइपुगेको सापकोटाले बताए । जिल्लाभर २४ हजार ६४८ जनाले खोप लगाएकामा १९ हजार ८४७ ले दोस्रो मात्रा लगाइसकेका छन् ।
