धरान / धरान उपमहानगरपालिकाको वडा नम्बर १६ को कार्यालयमा गए राती चोरी भएको छ । पिपिई लगाएर आएको व्यक्तिले ताला फोडेर कार्यालयका सामान चोरी गरेको प्रहरीले जानकारी गराएको छ ।
कार्यालयमा रहेको सिसिटिभी फुटेजमा पिपिई लगाएका एक व्यक्ति गेट फुटाएर कार्यालय हातमा प्रवेश गरेको पाइएको सो वडाका वडा अध्यक्ष दिलकुमार गिरीले जानकारी गराएका छन् ।
उनका अनुसार चोरीमा संलग्नले वडा सचिव टिकाराम निरौलाको कोठाबाट कम्प्युटर सेट र प्रिन्टर अनि स्वास्थ्य शाखामा रहेका कम्प्युटर थान एक लगेको देखिन्छ ।
चोरीमा संलग्नले सभा हलमा रहेको ज्येष्ठ नागरिक समाजको दराज फुटाउनुका साथै टेबल पंखा भाँचिदिएको दृष्य सिसिटिभी फुटेजमा कैद भएको गिरीले जानकारी गराएका छन् । चोरीमा संलग्न राजश्व फाँट रहेको कोठामा प्रवेश नगरेकाले थप क्षति नभएको गिरीले बताएका छन् ।
सिसिटिभीमा कैद भएको दृष्यमा राती ११ बजेर २५ मिनेटमा चोरीमा संलग्न व्यक्ति कार्यालयमा प्रवेश गरी त्यहाँबाट बिहान ३ बजेर ५७ मिनेटमा बाहिरिएको देखिन्छ ।
