काठमाडौँ / लोडसेडिङ र प्राधिकरणभित्रका बेथिति अन्त्यका लागि महत्वपूर्ण भूमिका खेलेका कुलमान घिसिङलाई पुनः नेपाल विद्युत प्रधिकरणको कार्यकारी निर्देशक बनाउने तयारी सुरु भएको छ ।
माओवादी केन्द्रका अध्यक्ष पुष्पकमल दाहाल (प्रचण्ड)ले घिसिङलाई पुनः प्राधिकरणको कार्यकारी निर्देशकमा ल्याउन उर्जा, जलश्रोत तथा सिँचाइमन्त्री पम्फा भुसाललाई निर्देशन दिएका छन् ।
घिसिङलाई आगामी भदौ १ गते प्राधिकरणको वार्षिकोत्सव सकिएलगत्तै पुनः जिम्मेवारी दिने गरी काम अधि बढाइएको माओवादी केन्द्रको सचिवालयले जानकारी दिएको छ । उर्जा मन्त्रालय स्रोतका अनुसार घिसिङलाई कार्यकारी निर्देशक बनाउन फाइल उठाउने काम सुरु भइसकेको छ ।
घिसिङ २०७३ भदौ २९ गते प्राधिकरणको कार्यकारी निर्देशकमा नियुक्त भएका थिए । २०७७ भदौ २८ गते घिसिङको चार वर्षको कार्यकाल पुरा भएको थियो ।
तत्कालीन प्रधानमन्त्री केपी शर्मा ओलीलाई घिसिङलाई पुनः निरन्तरता दिने सम्बन्धी प्रस्ताव उर्जा, जलश्रोत तथा सिँचाइमन्त्री वर्षमान पुनले मन्त्रिपरिषद्मा लगेको थिए । तर, प्रधानमन्त्री ओलीले उक्त प्रस्ताव मन्त्रिपरिषद्को एजेण्डामा राखेनन् । आममानिसले घिसिङलाई पुनः नियुक्तिका लागि दवाव दिए पनि ओलीले हितेन्द्रदेव शाक्यलाई प्राधिकरणको कार्यकारी निर्देशक बनाएका थिए ।
