नवलपुर / राष्ट्रिय गौरवको आयोजनाको रूपमा
रहेको नारायणगढ–बुटवल
सडक विस्तारको कामले तीव्रता पाउन सकेको छैन । कोभिड–१९ का कारण सडक विस्तारमा ढिलाइ
भइरहेको अवस्थामा मनसुन शुरु भएसँगै सडक विस्तारमा थप जटिलता आएको नारायणगढ–बुटवल सडक विस्तार आयोजनाले जनाएको छ ।
नारायणगढ–बुटवल सडक विस्तार आयोजना खण्ड १ का सूचना अधिकारी इञ्जिनीयर कृष्ण
आचार्यले बर्सातको समयमा पुल निर्माणको काम मात्रै भइरहेको जानकारी दिएका छन् ।
नारायणगढ–बुटवल सडक विस्तार आयोजना खण्ड १ प्रमुख रमेशकुमार दिष्टीले
दिनहुँजस्तो पानी परिरहेकाले पुल निर्माणबाहेक अन्य काम गर्न नसकिएको बताएका छन् । “मनसुनका कारण आवश्यकतानुसार सडक विस्तारमा मजदुर परिचालन गर्न सकिएको
छैन”, दिष्टी भन्छन् , “दैनिकजसो पानी परिरहेको कारण मजदुरले
पनि काम गर्न नपाउने र ठेकेदारले पनि काम दिन नसक्ने अवस्था छ ।” पानी पर्न रोकिने बित्तिकै सडक
विस्तारका लागि रुख काट्न पनि जनशक्ति परिचालन गरिने उनले बताएका छन् ।
सडक विस्तारको कामको प्रगति आठ प्रतिशत भएको
भन्दै दिष्टीले बर्खापछि कामले तीव्रता पाउने बताएका छन् । पूर्वपश्चिम राजमार्गको बुटवल–नारायणगढ सडकखण्ड विस्तारको कामलाई
गैँडाकोट दाउन्ने (६५ किमी) सडकलाई ‘खण्ड १’ तथा
दाउन्ने बुटवल (४९ किमी) सडकलाई ‘खण्ड
२’ मा विभाजन गरेर
निर्माणको काम भइरहेको छ । ग्लोबल टेन्डरमार्फत रु १६ अर्ब ९९ करोड ५२ लाखमा दुवै
खण्डको निर्माणको जिम्मा चाइना स्टेट कन्स्ट्रक्सन इञ्जिनीयरिङ कर्पोरेशनले पाएर
निर्माणको काम अगाडि बढाएको हो ।
